Xorvatiya yığmasının kapitanı və lideri Luka Modriç maraqlı paylaşım edib.

"Football-plus.az" xəbər verir ki, 2018-də ''Qızıl top'u qazanmış ''Real''ın yarımmüdafiəçisi öz ''instaqram'' hesabının hekayə bölümündə Türkiyəyə qarşı son oyunda əvəzlənərkən çəkilən şəklini paylaşıb.

''Təşəkkürlər'' sözünü yazan Modriç Türkiyə bayrağını da şəkilin üstünə əlavə edib. Bununla da 37 yaşlı futbolçu türkiyəli futbolsevərlərə təşəkkürünü bildirib. Məsələ burasındadı ki, Modriç Türkiyəyə qarşı səfər oyununun 84-cü dəqiqəsində əvəzlənərkən yerli fanatlar onu alqışlarla yola salmışdı.

Bilindiyi kimi, həmin qarşılaşma xorvatların 2:0 hesablı qələbəsi ilə yekunlaşmışdı. Oyundan sonra xorvatların çalışdırıcısı Zlatko Daliç də türkiyəli fanatlara təşəkkürünü bildirmiş və onların Modriçi alqışlamasını heç vaxt unutmayacağını qeyd etmişdi.