Mehman Allahverdiyev qardaşının qisasını alır, İsgəndər Cavadov susur...

22 turdan sonra hesabında 14 xal olan “Kəpəz” turnir cədvəlinin dibində qərarlaşıb ki, bu da gəncəli azarkeşlər tərəfindən xoş qarşılanmır. Lakin ikinci “beşlik”də elə vəziyyət yaranıb ki, bir qələbə “sarı-göylər”i zirzəmidən çıxara bilər. Qarşıda isə Tərlan Əhmədovun komandasını öz meydanında “Şamaxı” ilə görüş gözləyir. Qış fasiləsindən sonra baş tutan “Qəbələ” və “Qarabağ”la matçlar göstərdi ki, “Kəpəz” “doğma divarlar” arasında istənilən rəqibə başağrı ola bilir. Təəssüf ki, bu gün “sarı-göylər”in düşərgəsində qarşıdan gələn oyundan çox meydandan kənarda gedən oyunlar barədə düşünürlər.

Baş məşqçinin üsyanı

“Turan Tovuz”la matçdan sonra Tərlan Əhmədovun mətbuat konfransında səsləndirdiyi fikirlər normal klubda zəlzələ effekti verməliydi. Baş məşqçi açıq-aydın, hamının başa düşə biləcəyi tərzdə ona qarşı klubda “torbatikmə əməliyyatı”nın getdiyini, hətta rəhbərliyin kimlərin aranı qarışdırdığını bildiyini söylədi. Normal klub bu açıqlamadan sonra ən azı mətbuat konfransı təşkil edər, ya baş məşqçinin haqlı olduğunu söyləyib ara qarışdıranları klubdan uzaqlaşdırar, ya da Əhmədovun yalan dediyini söyləyib onunla vidalaşardı. Ancaq Tərlan bəyin məlum açıqlamalarının üstündən 4 gün keçməsinə baxmayaraq, nə araqarışdıranların adı ictimaiyyətə açıqlanıb, nə də baş məşqçinin yalan danışdığı deyilib. Susmaq isə razılıq əlamətidi. Belə çıxır ki, İdarə Heyətinin sədri İlqar Nadiri, klubun AFFA tərəfindən təyin olunan kuratoru İsgəndər Cavadov hər şeydən xəbərdardı. Sadəcə, nə baş məşqçi ilə yolları ayırmağa cürətləri çatır, nə də ona qarşı çıxanlara “sus” deməyi bacarırlar.

Niyə məhz İsgəndər Cavadov?

Əhmədovun tarixə düşəcək mətbuat konfransında xüsusilə İsgəndər Cavadovun adını çəkməsinin, baş məşqçi olandan sonra onunla yalnız bir dəfə görüşdyünü vurğulamasının arxasında nə durur? Tərlan bəy açıq-aydın klubda gəncəli - bakılı söhbətinin baş qaldırğını açıqladı. Onun fikrincə, İdarə Heyətinin sədri bu məsələdə hər nə qədər bitərəf qalmağa çalışsa da, istəsə də, istəməsə də, şəhərin sakini kimi (hərçənd ki, indi Bakıda yaşayır) yerlilərinin tərəfini tutacaq. Bu səbəbdən Əhmədov Cavadovun ortaya çıxaraq, nüfuzundan istifadə edib söz-söhbətə son qoymasını istəyir. Gəlin etiraf edək ki, Nadiri hər nə qədər deyildiyi kimi yaxşı insan olsa da, istər idarəçilik, istərsə də futbol camiəsində status baxımından Cavadov deyil. Nadirinin üzüyola olması, başverənlərə vaxtında reaksiya göstərməməsi klubun daxilində müxalifətin formalaşmasına şərait yaradıb. Bu gün “Kəpəz”də heç də rəhbər post tutmayanlar öz maraqlarına uyğun azarkeşləri yönəldirsə, bir qrup şəxs istədikləri adamı baş məşqçi postuna gətirmək üçün rəhbərliyin başının üstündən müəyyən işlər görürsə, bu birbaşa İdarə Heyətinin sədrinin günahıdı. Onun zəif iradəsi, proseslərə müdaxilə etməməsi, qısa desək, yumruğunu stola vura bilməməsi bu gün tarixi ənənələrə malik klubu rəzil duruma salıb.

Qardaş qisası

Hamı yaxşı bilir ki, nə qədər Gəncədə Mehman Allahverdiyev var, onun xeyir-duası olmadan heç kim “Kəpəz”də uzun müddət çalışa bilməz. “Sarı-göylər”in tarixi uğurlarında imzası olan 63 yaşlı mütəxəssis hazırda klubun idman direktoru postunu tutur. Və məntiqlə, idman direktoru kimi klubda başverənlərə görə müəyyən qədər o da məsuliyyət daşıyır. Ancaq nədənsə Əhmədov vaxtilə “Neftçi”də bir yerdə oynadığı Allahverdiyevin adını çəkmir. Niyə? Ona görə ki, Mehman bəylə baş-başa gəlmək istəmir. Tərlan bəy yaxşı bilir ki, kluba gəldiyi ilk gündə verdiyi qərarla Allahverdiyev qardaşlarından böyüyünün ayağını tapdalayıb. Söhbət onun Füzuli Allahverdiyevi əsas komandanın məşqçilər korpusundan uzaqlaşdırmasından gedir. Hələ o vaxt qeyd etmişdik ki, bu xəmir çox su aparacaq, Mehman bəy qardaşının intiqamını alacaq. Və proseslərin axarı göstərir ki, buz yerindən tərpənib. Allahverdiyev yaranmış durumdan maksimum istifadə edib, hazırkı baş məşqçini yola salmağa çalışır. Sizcə, Əhmədov “futbolçuları öyrədirlər ki, pulunuzu almamış klubdan getməyin” deməklə kimin “bostanına daş atır?” Bilmədizsə, deyək. Baş məşqçinin əsas komandadan uzaqlaşdırdığı Rauf Əliyev və Əfran İsmayılovla danışıqlar aparmağı rəhbərlik məhz Allahverdiyevə tapşırmışdı. O isə rəhbərliyə “futbolçular pullarını almamış getməyəcəklər” deyərək, danışıqların əlavə vaxt itkisi olduğunu söyləmişdi. Ancaq sonda İlqar bəy Əfran və Rauf ilə görüşərək qarşılıqlı razılıq əsasında yolları ayrıdı. Bu gün Gəncədə hamı yaxşı bilir ki, Əhmədovu baş məşqçi postunda görmək istəməyən müxalifət məhz Allahverdiyevin ətrafında birləşib.

Akademiyanın məşqçiləri də narazıdı

“Qarabağ”la oyundan sonra Tərlan bəy komandasının yalnız oyundan-oyuna təbii örtüyə çıxdığını etiraf etmişdi. “Kəpəz”in əsas komandası da istər əvəzedicilər, istərsə də akademiyanın müxtəlif yaş qrupları kimi süni örtükdə hazırlıq keçdiyindən meydan problemi yaşanır. Tərlan bəy əsas komandanın çalışdırıcısı kimi istədiyi vaxt məşq təyin etmək səlahiyyətindən istifadə edərək, heç kimi nəzərə almadan akademiyanın müxtəlif yaş qruplarının hazırlıq prosesini pozur. Və bu da sistematik hal aldığından artıq aşağı yaş qruplarında çalışanlar ondan rəhbərliyə şikayət edir. Narazılıq son həddə çatıb. Akademiyanın əlaqələndiricisi, qış fasiləsində məcburiyyətdən “Kəpəz”i “Şamaxı”ya dəyişən Əli Səmədovun atası İlham Səmədov da Tərlan Əhmədovla “ulduzu barışmayanlar” sırasındadı.

RƏŞAD