Qış fasiləsindən sonra "Kəpəz" zəif performans sərgiləyir. Komanda son 4 oyunda cəmi 1 xal toplamaqla turnir cədvəlinin dibinə yuvarlanıb.

"Sarı-göylər"in uğursuz çıxışıyla bağlı ötən gün klubdaxili iclas keçirilib. Toplantıda icraçı direktoru İlqar Nadiri, əsas komandanın baş məşqçisi Tərlan Əhmədov, idman direktoru Mehman Allahverdiyev, akademiyanın kuratoru İlham Səmədov, mühafizə xidmətinin rəisi Elmar Əliyev, əvəzedici komandanın çalışdırıcısı Xaliq Mərdanov, mətbuat katibi Azad Mustafayev və digər şəxslər iştirak edib. Deyilənə görə, müzakirə zamanı əvəzedici komandanın baş məşqçisi Xaliq Mərdanov Tərlan Əhmədovu tənqid edib. Həmkarına "özünə hörmət edən şəxs klubdan çıxıb getməlidi" deyən mütəxəssis iclası tərk edib.

"Football-plus.az" saytı olaraq bu iddianın nə dərəcədə doğru olub-olmadığını aydınlaşdırmağa çalıçdıq. Xaliq Mərdanovu dinləyək:

"Kəpəz"in son oyunlardakı uğursuz çıxışıyla bağlı toplaşmışdıq. İclasda klub rəsmiləri və başqa şəxslər də vardı. Bir gəncəli, veteran futbolçu, məşqçi, azarkeş kimi komandanın sərgilədiyi oyundan və nəticələrindən narazılığımı bildirmişəm. "Kəpəz" belə çıxış etməməlidi. Tənqid edib toplantını erkən tərk etməyimə gəlincə, bu birbaşa əvəzedici komandanın məşqiylə bağlı idi. Hətta məşqə 10 dəqiqə gecikdim. Yoxsa sona qədər qalıb, digər şəxslərin də çıxışını dinləyər, əlavə nəsə deyərdim".

ABDULLA İSMAYILOĞLU