Qış fasiləsindən sonra uğursuz nəticə göstərən komandalardan biri də "Kəpəz"di.

Football-plus.az xəbər verir ki, "sarı-göylər" son 4 oyunda cəmi 2 xal qazanıb.

Azarkeşlər 22-ci turda səfərdə "Turan Tovuz"a məğlub olan Gəncə təmsilçisinin baş məqşçisi Tərlan Əhmədovu istefaya səslədi. Mütəxəssis isə mətbuat konfransında rəhbərliklə görüşüb məsələni müzakirə edəcəklərini söylədi.

Görüş dünən baş tutmalıydı. Bunu nəzərə alıb axşam saatlarında klubun İdarə Heyətinin sədri İlqar Nadiriylə əlaqə saxladıq:

"Biz hər oyundan sonra Tərlan müəllimlə görüşüb matç barədə hesabat tələb edir, təhlillər aparırıq. Həm özümüzün irad və təkliflərimizi deyirik, həm də baş məşqçinin fikirlərini dinləyirik. Azarkeşlərin “istefa” şuarlarına gəlincə, normal haldı. Qərb derbisi həmişə coşqulu, emosiyalı keçib. Ona görə də azarkeşlərimizin etirazlarını anlayır və hörmətlə qarşılayırıq. Qısası, Tərlan Əhmədovla görüşüb müzakirə aparmağımız nə azarkeşlərin şüarı, nə də baş məşqçi ilə yollarımızı ayırmaqla bağlıdı. Komandada heç bir dəyişiklik yoxdu, hər şey qaydasındadı".

Amma bizə çatan bilgiyə görə, dünənki görüş heç də xoş ab-havada keçməyib. Tərlan bəy rəhbərlikdən 3 oyunluq möhlət istəyib. Gəncədə heç cür sular durulmur ki durulmur...

ABDULLA İSMAYILOĞLU