Millinin və “Qarabağ”ın sabiq hücumçusu Vüqar Nadirov sosial şəbəkələrdə tənqid hədəfinə tuş gəlib.

Buna səbəb onun “Tik-Tok”da yayınlanan “Təkərdə” şousunda iştirak etməsidi. Azər Zahidin aparıcılıq etdiyi verilişdə şou nümayəndələri ilə yarışan Nadirovun iştirakı izləyicilər tərəfindən yaxşı qarşılanmayıb. Azarkeşlər onun belə şoulara pul qazanmaq üçün qatılmasının peşəkarlığına və karyerasına yaraşmadığını bildiriblər. Tərəfdarlar keçmiş forvardın izləyicilərdən hədiyyə istəməsini də birmənalı qarşılamayıb. Bəs görəsən, Vüqar özü bu barədə nə düşünür? Bu və bizi maraqlandıran başqa suallara cavab tapmaq üçün onunla danışdıq.

- Necə oldu ki, “Təkərdə” şousuna qatıldın?
- Şounun aparıcısı Azər yaxın dostumuz, həm də futbol azarkeşidi. Belə bir yarışma təşkil etdiyini və məni iştirakçılar arasında görmək istədiyini bildirdi. Hətta məni birinci şouya dəvət etmişdi. Sadəcə, bəzi işlərim oluğundan onda qatıla bilməmişdim. Bu dəfə isə dəvəti qəbul edib gəldim.

- Şouda hazırda neçə nəfər qalıb?
- 7 nəfərlə yola davam edirik. Sona kim qalacaqsa, qalib də o olacaq.

- Qalib gələcəyinə inamın var?
- İndidən heç nə deyə bilmərəm. Kimə daha çox səs versələr, o da sonda maşına sahib çıxcaq.

- Şouda qalib jetonla müəyyənləşir. Futbol camiəsindən çox jeton göndərirlər?
- Bu günə kimi yalnız Cavid İmamverdiyev yanımda olub. O həm maddi, həm də mənəvi dəstəkdi. Fürsətdən istifadə edib ona “çox sağ ol” deyirəm. Futbol aləmindən başqa heç kimi görməmişəm. Bəlkə də başqa adla mənə jeton göndərən olur. Özüm də futbol oynayarkən başqa adlarla belə yarışmalara qatılanlara sms göndərmişəm. Ola bilsin, mənə dəstək olanlar arasında da futbolçular var. Sadəcə, ictimaiyyətdə adı hallanmasın deyə özünü büruzə vermir. Belə də ki, göndərən də sağ olsun, göndərməyən də. Necə deyərlər, kasıbın da qadasını alım, varlının da.

- “Təkərdə”yə qatılmağın cəmiyyətdə heç də yaxşı qarşılanmayıb. Daha dəqiq desək, kontingetin sənin səviyyənə uyğun olmadığını deyirlər.
- Niyə bizdə hər yeniliyə ağız büzürlər? Türkiyədə, Avropada məgər belə şoular yoxdu? Təbii ki, var və tanınmış idmançılar, incəsənət xadimləri bu yarışmalara qatılırlar. Hər kəs özünə cavabdehdi. Şükürlər olsun, hamı məni tanıyır. Dəvət gəlib, getmişəm. Məni kiminsə həyatı maraqlandırmır, özümə cavabdehəm. Bəli, tik-toker deyiləm, ancaq yarışa qoşulduğum üçün də peşman deyiləm. Əvvəlki vaxtım olsaydı, mən də futbolçu yox, tik-toker olardım (gülür). Hamısının yüzminlərlə izləyicisi var. Mənim bu yarışda iştirakıma ağız büzənlər izlənmə sayına baxsınlar. Bu gün premyer-liqanın oyunlarına neçə tamaşaçı gəlir? Ən çox azarkeş olan matç, səhv etmirəmsə, “Sabah” – “Qarabağ” oyunu olub ki, onu da tribunadan 10 min tamaşaçı izləyib. Bu gün “Təkər” şouya milyonlarla tamaşaçı baxır. Hər gün canlı yayında 80 min adam olur. Fərqi görürsüz? Şou tək Azərbaycanda yox, Avropada, Rusiyada geniş auditoriya toplayıb. Əvvələr məni futbolla maraqlananlar tanıyırdısa, bu gün artıq başqa sahənin insanları da tanıyır. Veriliş o qədər populyarlıq qazanıb ki, hər gün yüzlərlə zəng edib, nə vaxt başlayacağı ilə maraqlanırlar. Hər kəsin öz həyatı var. Kiminsə işinə qarışmıram, imkan vermərəm də kimsə barəmdə nəsə desin.

RƏŞAD