Braziliya futbolu unikal istedadlar yetişdirməkdə məşhurdu.

Football-plus.az xəbər verir ki, Neymardan sonra hələ ki heç kim dünyanın diqqət mərkəzinə düşməmişdi. Amma son vaxtlar hər kəs sözünün əvvəlində də “Palmeyras”ın 16 yaşlı hücumçusu Endrikin adını çəkir, axırında da. Onun möhtəşəm fərdi keçidlərdən və ya cərimə meydançasının xətti üzərindən “qayçı” zərbəsi ilə vurduğu qollar artıq çoxdan internetdə hitə çevrilib. Əlbəttə, skeptiklər “hələ uşaqdı, gələcəyinin necə olacağını demək olmaz” deyə bilər. Ancaq Endrik uşaqlar yox, böyüklər arasında, yəni U-20 səviyyəsində keçirilən turnirlərdə ən yaxşı sayılır. Özü də 15 yaşında! Elə həmin vaxtdan da top-klubların diqqətini çəkib, bəzi təmaslarla bağlı xəbərlər isə artıq mediaya da sızıb. Məsələn, “Barselona”nın baş məşqçisi Xavinin fikirləri ilə tanış olaq:

Ancaq kataloniyalılar məhdud maliyyə imkanları üzündən danışıqları rəsmi təklif göndərmək səviyyəsinə çatdırmadı. Əvəzində PSJ braziliyalıya görə 45 milyon avro təklif etməklə çərçivəni qaldırdı. Şayiələrə görə, “Çelsi”nin təmsilçiləri hətta Endrikin atasının Londona səfərini də təşkil edib. Sadəcə, hansısa məqamda “zadəganlar” ya oyundan çıxdılar, ya da danışıqları kənara informasiya sızdırmadan davam etdirmək yolunu tutdular. Öz növbəsində Parisdən “Palmeyras”ın birdən-birə iki futbolçusuna təklif gəldi. Dünya futbolunun əsas insayderlərindən biri Fabritsio Romanonun xəbərinə inansaq, fransalılar Endrikə görə 58, istedadına görə ondan heç də geri qalmayan 2007 doğumlu Estevaoya görə isə 35 milyon ödəməyə hazırdılar. Braziliya klubu bütün başqa təkliflərdən imtina edəndən sonra aydın oldu ki, bu mübarizənin favoriti “Real”dı.

İlin sonuna qədər sövdələşmənin başa çatması gözlənilir. Ancaq bu olayın yaxın günlərdə baş verməyəcəyi də dəqiqdi. Ona görə ki, Braziliya tərəfinin bəzi təmsilçiləri Qətərdə keçirilən dünya çempionatını izləyirlər. Bununla belə, aydındı ki, “kral klubu” “Palmeyras”ın maliyyə tələbini tam qarşılayacaq və “yaşıl-ağlar”a 60 milyon avro ödəyəcək. İspaniyanın vergi qanunvericiliyini və tranzaksiya ödənişini də nəzərə alsaq, sövdələşmənin ümumi dəyəri 72 milyon avroya yüksələ bilər. Bu pulu dərhal ödəmək lazım gəlməyəcək, madridlilərin bir neçə tranş ilə 2024-ün yayına qədər hesablaşmaq imkanı var. Bu müddət havadan götürülməyib, Endrikin İspaniyaya gələ biləcəyi – yalnız 18 yaşı tamam olandan sonra mümkündü – vaxta uyğunlaşdırılıb. Odu ki, yeniyetmə forvardın “Palmeyras”da ilk titulları və Libertadores kubokunu qazanmaqla bağlı planlarını həyata keçirmək üçün ilyarım vaxtı var. Bu turnirin yeni mövsümündə əvvəlki üç tituldan ikisini qazanan “Palmeyras”ın favoritlər sırasında olacağı şübhə doğurmur. Bu müddət həm də portuqaliyalı məşqçi Abel Ferreyranın əlinin altında olan Endrikə Avropa futboluna daha yaxşı hazırlaşmaq üçün lazımdı. “Real” bəzi başqa braziliyalılara münasibətdə də eyni yanaşmanı ortaya qoyub. Məsələn, Vinisius Juniorla Rodriqo madridlilərlə müqavilə bağlayandan sonra yetkinliş yaşına çatana qədər, uyğun olaraq, “Flamenqo” və “Santos”un heyətində oynamaqda davam etdilər. Hərçənd Dortmund “Borussiya”sına və “Jirona”ya icarəyə verilən Reynierin timsalında hələ ki heç də uğurlu olmayan nümunə də var. Bu 20 yaşlı yarımmüdafiəçi 30 milyon avroluq futbolçu səviyyəsində oynamır. Əks halda Tokio Olimpiadasının qalibi indi Madriddə olardı. Bir halda ki Avropa İttifaqına daxil olmayan ölkələrdən olan legionerlər üçün vakant yer var. Bu, İspaniya pasportu alan Vinisiusun sayəsində mümkün olub. Görünür, o, iştirak ərizəsində məhz Endrik üçün yer boşaldıb. Və bunda da müəyyən rəmzilik axtara bilərik. Vini vaxtilə üzərində avtoqrafı olan “Real” formasını yeniyetmə həmvətəninə göndərmişdi.

Braziliya futbolunun azarkeşləri artıq xəyalların qoynunda 2024-ün yayına yollanır, “Real”ın Vinisius, Rodriqo və hücumun mərkəzində Benzemanı əvəz edəcək Endrikdən ibarət hücum “üçlüy”ünü təsəvvür edirlər. Braziliyalı ekspertlər Endrikin onlara Romario ilə Ronaldonu xatırlatdığını deyirlər. Bəlkə də bir başqasının belə müqayisədən başı gicəllənə bilər. Amma “Palmeyras”da vunderkində çox hörmətlə yanaşır və hadisələri qabaqlamaq istəmirlər. Klub prezidenti Leyla Pereyranın fikirləri:



Bu arada Abel Ferrayra yeniyetməyə məşqlərdə əsas komandanın oyunçuları ilə rəqabət aparmaq imkanı yaratdı. Ta o vaxta qədər ki, A seriyasının son illərdəki ən yaxşı müdafiəçilərindən biri, paraqvaylı Qustavo Qomes baş məşqçiyə bu sözlərlə üz tutdu:



Bir neçə gün sonra “Palmeyras”ın tarixinə ölkə çempionatında debüt edən ən aşağı yaşlı futbolçu kimi düşən Endrik uşaqlıqdan ona inanan, oyunlarından videoçarxları “yutub”da yerləşdirən atasını ağlamağa məcbur etdi. Yeniyetmə meydana çıxdığı 7 oyunda 3 qol vurdu və 1 məhsuldar ötürmə verdi. “Atletiko Paranense” ilə oyundakı dubl isə Braziliya çempionatı tarixinə ən “gənc” dubl kimi düşdü və Endrikin Pelenin 1957-ci ildə müəyyənləşdirdiyi rekordu yeniləməsinə imkan verdi. Məhz bu dubldan sonra Endrik həmklubu, Braziliya yığmasının 3-cü qapıçısı Vevertondan vəd etdiyi möhtəşəm idman ayaqqabını hədiyyə kimi aldı. Dahi Ronaldo isə dedi ki, bu yeniyetməni Braziliya yığmasına çağırardı. Elə Fenomenin özünü də Karlos Alberto Parreyra məhz 17 yaşında Braziliya üçün zəfərlə bitən DÇ-94-ə aparmışdı. Ancaq hər şeyin öz vaxtı var. İndi pentakampeonların hücum xəttində Rişarlison parlayır və Endriki Adriano ilə müqayisə edir. Qabriel Jezus da “Palmeyras”dakı xələfini tərifləyir. Təriflər öz yerində, həmklublarının hər biri vunderkindi təvazökar, dinləmək bacarığı və öyrənmək həvəsi olan uşaq kimi xarakterizə edirlər. Belə davam edərsə, ilyarım sonra “Real”ın düşərgəsinə hazır ulduz kimi qədəm qoyacaq.