Türkiyə hakimliyi ilə bağlı yeni xəbərlər var.

Türkiyə Futbol Federasiyasının nəzdində fəaliyyət göstərən Hakimlər Komitəsi (HK) 3 ədalət təmsilçisindən belə desək, fiti yerə qoyaraq VAR hakimi olmağı tələb edib. Onların 3-ü də bu təklifi geri çevirib. Bundan başqa, FİFA-ya göndərilən siyahıda iki dəyişiklik baş verib.

Srağagün Antalyada keçirilən seminarda sürpriz olay yaşandı. HK rəhbərliyi bu mövsüm öz performansı ilə ciddi tənqid atəşinə tutulan 3 hakim – Hüseyin Göçək, Hüseyin Arslanboğa və Burak Şəkərə VAR hakimliyinə keçməyi təklif etdi. Amma onların hər üçü də bu dəyişikliyə hazır olmadıqlarını və baş hakim kimi karyeralarını davam etdirmək istədiklərini deyərək təklifi rədd etdilər. Bu ayın sonunda gələn il üçün hansı hakimin hansı kateqoriyada olacağı, hansə vəzifəni icra edəcəyi bəlli olacaq. HK-nın sözügedən 3 hakimlə bağlı radikal qərar qəbul edəcəyi gözlənilir. Bu arada adı FİFA hakimi kateqoriyasından çıxarılan 2 hakim – Cüneyt Çakır ilə Zorbay Küçükün əvəzinə ora hansı hakimlərin daxil ediləcəyinə aydınlıq gəlib. Bilindiyi kimi, Çakır karyerasını bitirmək qərarına gəlib. Zorbay Küçük isə FİFA kateqoriyasına bu il keçirilmişdi. Amma 30 yaşlı gənc hakim ona bəslənilən ümidləri və bu məsuliyyətli statusu doğrulda bilmədi. Superliqa matçlarında yol verdiyi kobud səhvlər azmış kimi, Küçük mayın 8-11-də Nyonda FİFA hakimləri üçün olan testlərdən keçə bilməmişdi. HK onların əvəzinə FİFA-ya Atilla Karaoğlanla Ərkan Özdamarın adını göndərib. Onların hər ikisi də xarici dil testindən uğurlu şəkildə keçib. Bu arada mövsümün əvvəlində VAR hakimləri ilə əsas hakimləri ayıran HK səssiz-sədasız şəkildə maraqlı bir addım atdı. Belə ki, Mete Kalkavanla Abdulkadir Bitigen bundan sonra həm VAR, həm də əsas hakim funksiyasını icra edə biləcək. Bunun üçün təlimatlarda yenidən dəyişiklik ediləcək. Halbuki mövsümün əvvəlində belə qərarlaşdırılmışdı ki, əsas hakim VAR hakimi ola bilməz! Görünür, HK bu addımı VAR hakimlərinin sayının azlığı üzündən atmalı oldu. Bundan başqa, hakimlərin superliqaya yüksəlməsi baxımından yeni meyarlar müəyyənləşdirilməsi diqqəti çəkir. Komitənin fikrincə, bunun sayəsində hakimlikdə bəzilərinin dost-qardaş hesabına irəliləməsinin qarşısı alınacaq. Belə ki, bir hakim superliqaya yüksəlmək üçün əvvəlcə 1-ci liqada 2 il işləməli və orda ən azı 30 oyun idarə etməlidi! Və nəhayət, federasiya tərəfindən yeni qurulan “Hakimlər akademiyası”nın başına HK-nın sabiq sədri Oğuz Sarvanın gətirilməsinə qərar verilib. Sarvan yeni işinə yeni ildən etibarən start verəcək.