Almaniya yığması nə qədər acınacaqlı olsa da, ardıcıl 2-ci dünya çempionatında qrupdan çıxa bilmədi.

Dördqat dünya çempionlarının bu nəticəsini fiaskodan fərqli təqdim etmək çətindi. Əslində bundestim elə İspaniya ilə oyundan sonra növbəti mərhələyə adlamaq şansını itirə bilərdi. Sadəcə, həmin oyunun sonuna 7 dəqiqə qalmış hesabı bərabərləşdirən Niklas Füllkruq alman futbolunun azarkeşlərinin daha 4 gün ümidlə yaşamasına səbəbkar oldu. “Verder”in 29 yaşlı hücumçusu Kosta Rika üzərində qazanılan, amma heç bir dəyəri olmayan qələbəyə də qolla töhfə verdi. Məhz Füllkruqu solğun Almaniya yığmasının bu turnirdəki yeganə parlaq nöqtəsi saymaq olar. Bu futbolçunu bir qədər yaxından tanıyaq.

DÇ-nin startı ərəfəsində Hans-Diter Fliki düşündürən əsas məsələ qolçu mərkəz forvardının yoxluğu idi. Timo Vernerin zədəsindən sonra belə görünürdü ki, hücumun sivri ucunda Kay Havertsin alternativi yoxdu. Ancaq Haverts Yaponiya ilə oyunda ümidləri doğrultmadığından İspaniya ilə oyunda Flik Müllerə bel bağladı. Tomasın hücumun sivri ucunda oynamaq təcrübəsi daha böyükdü, hərçənd veteranın son illərdəki oyunu daha çox məhsuldar ötürmələr vermək ilə səciyyələnir. Bir həftə əvvəl 18 yaşını tamamlayan Dortmund “Borussiya”sının vunderkindi Mukokoya güvənmək də risk idi. Almaniyanı Qətərdəki ardıcıl 2-ci məğlubiyyətdən adı çəkilən futbolçular yox, Füllkruq qurtardı. Gözlənilən və gözlənilməz qəhrəman. İş ondadı ki, Füllkruq bu payıza qədər heç vaxt milli forma geyməmişdi. Ancaq hazırda 10 qolla bundesliqanın ən yaxşı alman bombardiri olan birinin yığmanı xilas etməsindən təbii nə ola bilər ki?! Və bəlkə də Flik ona Yaponiya ilə oyunun 79-cu, İspaniya ilə oyunun 70-ci dəqiqəsində yox, daha tez güvənməliydi. Birincisi, onun bəxtinə məhz indi gün doğub və 29 yaşında karyerasının ən yaxşı mövsümünü keçirir. İkincisi, DÇ ərəfəsində Omana qarşı keçirilən son yoxlama oyununda da qələbə topunu məhz Füllkruq vurmuşdu.

Əlbəttə, Niklas yeni Herd Müller, yəni “millətin bombardiri” deyil. Bəlkə də bu statusa yiyələnə bilərdi, bütün karyerasını zədələr izləməsəydi. Yeniyetmə vaxtı aldığı zədə lap ekzotikdi: rəqib futbolçunun dişi hücumçunun alnına batmışdı! Ancaq qığırdaq problemi onun üçün xroniki xarakter aldı. Bu üzdən üç dəfə, hər dəfə də 5 aylığa sıradan çıxdı. Özü də belə zədələrdən birini Yoahim Lövün maraq dairəsində olduğu DÇ-2018 ərəfəsində aldı. Forvard 2019/20 mövsümünü də xaçabənzər bağların qırılması üzündən tam boşa verdi.

Belə “xəstəlik tarixçəsi” çoxlarını ruhdan salardı, ancaq Füllkruqun “Verder”dəki çalışdırıcısı Floran Kofeldtin dediyi kimi, hücumçu hər zədədən sonra yalnız meydana əvvəlkindən də güclü qayıtmaq haqda düşünüb. Düzdü, bremenlilər məhz bu mütəxəssislə dərin böhran yaşadı, son 40 ildə ilk dəfə aşağı bundesliqaya yuvarlandı. İkinci bundesliqada isə “musiqiçilər”in snayperi əvvəlcə ehtiyat oyunçular skamyasında əyləşsə də, Ole Vernerin baş məşqçi postuna gəlişi ilə hər şey dəyişdi. Füllkruq 19 qolla “Verder”in elitaya qayıtmasına yardım etdi, bu il isə özünü bütün Almaniyaya sevdirdi. Və ya ölkənin yığmaya görə narahat olan, forvardı Qətərdə görmək istəyən hissəsinə. Azarkeşlər onun tərəfini tutdu, ötənlərin Lotar Matteus kimi ulduzu Flikə çağırış etdi, Niklası yeniyetmələrdən ibarət yığmalarda çalışdıran AÇ-80-nin qəhrəmanı Horst Hrubeş də onu təriflədi:

“Sadə oğlan” ifadəsi Niklası çox dəqiq xarakterizə edir. Məsələn, o, xanımı ilə hələ ibtidai məktəbdə tanış olub. Yeni müqavilə ilə bağlı tarixçə də onun xarakterini açan cizgidi. Bundesliqaya qayıdan komandanın bombardiri yeni müqaviləyə imza atmaqla maaşının azaldılmasına razılaşdı. Və yalnız ona görə ki, Bremendə uzun müddət qala bilsin. Özü də Niklas qərarı haqda heç bir açıqlama vermədi, sadəcə, jurnalistlər detalları üzə çıxarandan sonra maaşın azaldılmasına razılıq verdiyini etiraf etdi.

Füllkruq əsl futbolçu ailəsində böyüyüb. Babası vaxtilə 2-ci divizionda oynayıb, bir müddət Niklasla məşğul olan atası “Hannover”in strukturunda məşqçi kimi çalışır, bacısı məhz bu klubun oyunçusudu. Yeri gəlmişkən, kiçik Füllkruq məhz atasının rəhbərliyi altında bir mövsümdə 162 qol vurmaqla bütün ölkənin diqqətini çəkmişdi. Onda Niklası onun üçün doğma olan “Verder”in akademiyasına dəvət etdilər, Avstriya yığmasının məşhur hücumçusu Qoran Arnautoviç isə peşəkar komandaya keçəndən sonra Niklasa Hep ləqəbini qoydu. Bu ləqəb Niklasa böyüməyən dişi üzündən çənəsində yaranan boşluğa görə verilib. Meydanda isə Füllkruq özünü dişli oyunçu kimi göstərdi, DÇ-yə yollanan yığmanın qapısını son anda araladı.

Forvard milli komandanın düşərgəsində olduğu ilk günlərdə verdiyi müsahibədə təvazökarcasına belə demişdi:

Düzdü, sağlıq durumu yenə hansısa məqamda Niklasa əngəl oldu, yığma Qətərə çatandan sonra yalnız o qrip üzündən ilk məşqləri buraxdı. Bəlkə də buna görə Flik ona heç bir oyunda start heyətində şans vermədi. Bəlkə də Niklasın əməyindən elə coker kimi yararlanmağı düşündüyünə görə qrupun hər oyununda sonradan meydana buraxdı. Gerçəklik isə budu ki, Füllkruq 29 yaşında ilk dəfə cəlb olunduğu yığmada özünü yetərincə yaxşı göstərsə də, bundestim Qətərdən biabırçı nəticə ilə ayrıldı. Ancaq bu nəticəyə görə ilk növbədə Flikdən və komandanın ulduzları hesabat verməlidi. Niklası qınamağa adamın dili gəlmir.