“Onlar mənim qırmızı yanaqlarıma baxır və düşünürdülər ki, sap-sağlamam”
2022-ci ildə nəyisə dünyadan gizlətmək çətindi, ancaq Lui van Qal bunu bacarıb.
O, apreldə RTV 4 Live telekanalının şousuna təşrif buyuraraq özünə qoyulan qorxunc diaqnozu açıqladı – “prostat xərçəngi”. Niderland yığmasının baş məşqçisi bütün dünyaya elan etdi ki, artıq neçə ildi bədxassəli şişlə mübarizə aparır.
Bu xəbər sensasiya kimi göründü, xüsusən də təfərrüatı nəzərə alanda. Van Qal bildirdi ki, futbolçulardan heç biri problemdən xəbər tutmayıb:
“Düşünmürəm ki, siz həmkarlarınızla belə şeylər haqda danışırsız, axı belə xəbərlər onların seçimlərinə, qərarlarına təsir göstərə bilər. Bu üzdən hesab etdim ki, futbolçuların xəbər tutmaması yaxşıdı. Onlar mənim qırmızı yanaqlarıma baxır və düşünürdülər ki, sap-sağlamam. Ancaq belə deyil. Hər toplanışımız vaxtı gecələr xəstəxanaya yollanırdım. Oyunçular heç nədən şübhələnmirdilər”.
Van Qalın futbolçuların fikrini yayındırmaq qərarı müdrik addımdı. O, 2021-in avqustunda yığmanın “sükanı arxasına” keçdi və təkcə dünya çempionatının yox, Millətlər Liqasının seçmə turnirində də parlaq nəticələrlə yadda qaldı. Van Qalın yığmadakı 3-cü dönəmində “narıncılar” cari DÇ də nəzərə alınmaqla 19 oyunun heç birində uduzmayıb (Argentina ilə oyundan əvvəl yazılıb – red.).
Van Qal davam edir:
“Hospitala baş çəkməklə bağlı xüsusi rejimim var idi. Mənə arxa qapıdan binaya daxil olmaq imkanı yaratmışdılar, xüsusi palata ayırmışdılar. Çox gözəl ünsiyyət saxlayırdılar”.
Məşqçi həkimlik sirrini saxladıqlarına, bununla bağlı informasiya kənara sızmadığına görə xəstəxananın personalına minnətdardı. Diaqnozdan xəbərdar olan tək-tük yaxını da susmuşdu:
“Dostlarımdan və əzizlərimdən xəstəliklə bağlı danışmamağı xahiş etdim. Məni əhatə edən adamların kimsəyə nəsə deməməsi bu adamların insani keyfiyyətlərindən xəbər verir”.
Ancaq bu sirrin qorunması o qədər də vacib deyil. Əsas olan müalicənin uğurlu getməsidi. Van Qal hamını sakitləşdirməyə tələsir:
“Prostat xərçəngi 90 faiz hallarda öldürmür. Adətən, adamı yan xəstəliklər məhv edir. Ancaq məndə xəstəliyin aqressiv forması idi, bu üzdən hər şeydən, o cümlədən şüa terapiyasının 25 seansından keçdim. Arından 5-6 ay gözləmək və müalicənin uğurlu keçdiyinə əmin olmaq lazım gəldi”.
Van Qal xəstəliyə fəlsəfi yanaşır:
“Bu da həyatımın bir hissəsidi. Çox şey görmüşəm, xəstəliyin nə olduğunu bilirəm. Artıq bir dəfə xərçənglə qarşılaşmışdım, həyat yoldaşımı bu xəstəlikdən itirdim. Bu təcrübə, necə deyərlər, məni insan kimi zənginləşdirdi”.
Van Qalın müsahibəsu bütün dünyada geniş əks-səda doğurdu. Niderlandlını əvvəllər çalışdırdığı superklublar – “Barselona”, “Bavariya”, “Mançester Yunayted” dəstəklədi. Mütəxəssis sosial şəbəkələrdə minlərlə xoş mesaj aldı. Mesaj göndərənlər arasında dünyanın tanınan futbol adamları da var idi.
Sağlıq durumundakı problemlərə baxmayaraq, Van Qal bir dəfə də komandadan ayrılmağı düşünmədi. Və Niderland Kral Futbol İttifaqı da dahi məşqçiyə dəstək verdi, bəyan etdi ki, dünya çempionatının sonunda qədər vəzifəsini yerinə yetirəcək. Ancaq Qətər mundialından sonra 71 yaşlı mütəxəssis yerini Ronald Kumana verəcək. Ümumiyyətlə, Van Qal 2019-cu il martın 11-də məşqçi karyerasını bitirdiyini elan etmişdi. Ancaq buna qədər də iki dəfə çalışdırdığı yığma naminə ötən il avqustun 4-də qərarından vaz keçdi. Yığmaya məhz tarixindəki ilk dünya çempionluğunu qazandırmaq niyyəti ilə döndü. Bu nəticə ünlü məşqçinin möhtəşəm karyerası üçün əla sonluq olardı!
Digər xəbərlər
