Almaniyada yetişən türkəsilli futbolçuların tez-tez yığma seçimində çətinlik çəkdiyinin şahidi olmuşuq.

Almaniya və Türkiyə futbolunu qarşı-qarşıya gətirən son oyunçu Salih Özcan oldu. 24 yaşlı dayaq yarımmüdafiəçisi ''Köln''ün yetirməsidi və demək olar bütün karyerasını bu klubda keçirib. Salih bu mövsüm öz oyunu ilə diqqət çəkməyə başladıqdan sonra həm Almaniya, həm də Türkiyə yığmasından təklif aldı. Hətta bundestimin baş məşqçisi Hans-Diter Flik və Almaniya Futbol İttifaqının üzvləri onun evinə gedərək valideynləri ilə də söhbət etmişdilər. Salihin Almaniyanı seçmək ehtimalı yüksək idi. Çünki o, U-15-dən U-21-ə qədər Almaniyanın bütün aşağı yaş qruplarından ibarət yığmalarının formasını geymişdi. Ötən il Salih həm də Almaniyanın U-21 yığması ilə Avropa çempionu olmuşdu. Amma istedadlı futbolçu bir qədər düşündükdən sonra fərqli qərar verərək öz doğma vətəni Türkiyəni seçib. Dünən bu barədə həm Türkiyə Futbol Federasiyasından, həm də futbolçunun özündən rəsmi açıqlama gəldi. Salihin seçimində ''ay-ulduzlular''ı onu gözəl tanıyan almaniyalı Ştefan Kuntsun çalışdırması heç də az rol oynamayıb.

Belə ki, Almaniyanın U-21 yığması məhz Kuntsun başçılığı altında Avropa çempionu olmuşdu və Salih də həmin komandanın aparıcı oyunçularından idi. Bu futbolçu artıq Konyaya yollanaraq Türkiyə yığmasının düşərgəsinə qoşulub. Xatırladaq ki, Türkiyə martın 29-da Konyada İtaliya ilə yoldaşlıq oyunu keçirəcək.