Dünya çempionatında 1/4 final mərhələsinə start verilir.
Bu gün turun ilk iki qarşılaşması keçiriləcək. Oyunlar haqda düşüncələrini almaq üçün Aslan Kərimovla əlaqə saxladıq. O, fikirlərini "Football-plus.az"a bölüşdü:
"1/4 finala qədər gələn komandaların gücü aşağı-yuxarı bərabərdi. Nisbətlərdə çox az fərq var. Millillərin hər biri üstün və zəif tərəflərə malikdi. Burda yalnız Mərakeşi istisna etmək olar. Xorvatiyalıların güclü heyəti var. Favorit komandalara qarşı layiqli mübarizə apara bilərlər. Onlar hər zaman ikinci nömrə ilə çıxış etdikləri matçlarda daha böyük uğurlar əldə ediblər. Düzdü, rəqib heyətində "Real"ın aparıcı oyunçusu olan bir komandadı. Amma Braziliya qarşısında 120 dəqiqə normal oyun nümayiş etdirmələri çətin görünür. Çünki xorvatların iştirak ərizəsində yaşlı oyunçular üstünlük təşkil edir. Lakin cinahları və yarımmüdafiə xətti güclüdü. Ötürmə etməyi, çətin situasiyalarda şans yaratmağı bacaran futbolçulardı. Bu, Braziliya üçün təhlükə yarada bilər. Hesab edirəm ki, Xorvatiya rəqibi geridə qarşılayıb, əks-hücumlara bel bağlayacaq.
Cənubi amerikalılarda isə hər zamankı kimi, individual oynamağı sevən futbolçuları var. Onların da cinahları çox güclüdü. Vinisius təkbətəkdə istənilən rəqibi geridə qoymağı bacarır. Neymarın zədəsi var idi. Məncə, bu gün meydana çıxacaq. O, tipik hücumçu olaraq yox, pleymeyker mövqeyində oynayacaq. Braziliyalıların çətinliyi xorvatların əks-hücumlarında olacaq. Neymarın isə top itirdikdən sonra geriyə çəkilmək mövzusunda çatışmazlıqları var. Amma hər halda mənə görə, şanslar 50-50-yədi.
Bu, Niderland - Argentina dueli üçün də keçərlidi. Burda Messinin nə qədər hərəkətli olacağı maraq doğurur. İlk matçda ona bu şansı yaratmadılar və komanda məğlub oldu. Lakin digər görüşləri durmadan hərəkətdə oldu və fərqini ortaya qoydu. Argentinanın indiyədək qarşılaşdığı rəqiblərin heç biri Niderland səviyyəsində deyildi. Bu səbəbdən rahat şəkildə qollar vura bilirdilər və qapılarında az top görmüşdülər. Səudiyyə Ərəbistanı ilə matç cənubi amerikalılar üçün bir işarə idi ki, hücumameylli oyunçuların müdafiəyə kömək etməsə, qapında qol görəcəksən.
Niderland belə səhvləri bağışlayan deyil. Avropalılar daha üstün görünür. Messinin komandası sıx müdafiə olunan kollektivə qarşı oynamağda çətinlik çəkir. Bu matçda da şanslar 50-50-yədi, lakin Niderlandın mərhələ keçməsi daha inandırıcı görünür".
İSMAYIL XEYRULLAYEV