''Fənərbaxça''nın bu yay heyətinə qatdığı mühüm isimlərdən biri Natan Akedi. Son mundialda Niderland yığmasının heyətində iştirak edən ''Mançester Siti''nin tanınmış müdafiəçisi ilə üçillik müqavilə imzalanıb. Bu keçid İstanbul nəhənginə 7 milyon avroya başa gəlib. 31 yaşlı futbolçu iyulun 10-dan etibarən Avstriyaya gələrək komandanın hazırlığına qoşulub. Təcrübəli futbolçu həm müdafiənin solunda, həm də mərkəzdə oynamağı bacarır.

"Siti" ilə 4 premyer-liqa, 1 ÇL daxil olmaqla 12 titul qazanan Ake ilk təəssüratını ''Fənərbaxça TV'' ilə bölüşüb.

* Həm sevincli, həm də həyəcanlıyam. Yeni klubumda ilk günlərim yetərincə yaxşı keçir. Burda hər kəs məni çox yaxşı qarşıladı. Ailəmlə yaxından maraqlandılar. Eləcə də mənə İstanbuldakı həyatdan bəhs etdilər. Baş məşqçi ilə də aramızda müəyyən söhbətlər oldu. O da mövcud durumumu soruşdu və mənlə bağlı planlarından bəhs etdi. Zatən qarşıdakı müddətdə onunla tez-tez söhbətimizin olacağını güman edirəm. Ümid edirəm ki, mövsüm hər birimiz üçün uğurlu alınacaq. Mövsümün başlamasını səbirsizliklə gözləyirəm.

* ''Fənərbaxça''nın mənə marağının olduğunu əvvəlcədən bilirdim. Danışıqlar prosesi çox rahat və sürətli keçdi. Burdan gələn təklif dərhal diqqətimi cəlb etdi. ''Mançester Siti''dən gözəl tanıdığım Edersonla telefonda söhbət etdim. O da mənə ''Fənərbaxça'' ilə bağlı yalnız xoş sözlər söylədi. Buranın mükəmməl bir klub olduğunu dedi. Eyni zamanda stadionumuzdakı atmosferdən, fanatlarımızın coşqusundan bəhs etdi. Bu sözləri eşitmək məni daha da həyəcanlandırdı. Daha sonra ''Siti'' ilə qalan transfer danışıqlarını sürətli şəkildə tamamladım. Yəni Türkiyəyə gəlməklə bağlı qərar vermək mənim üçün heç də çətin olmadı.

* Yığma komanda ilə keçirdiyim son oyunun ardından 8 günlük bir istirahətim oldu. Həmin müddətdə psixoloji cəhətdən rahatlamağa çalışdım. Çünki uzun və ağır mövsümlərdən sonra futbolçunun beyninin rahatlaması çox önəmlidi. Fiziki formamı bərpa etmək o qədər də çətin olmayacaq. Bir neçə məşqdən sonra formaya düşəcəyimi düşünürəm. Yəni komandaya faydalı olmaq üçün çox vaxta ehtiyac duymayacam. Çünki qeyd etdiyim kimi tətilim və futbolsuz günlərim o qədər də uzun çəkmədi. Bir neçə günə məşqçi korpusu tam mənə etibar edə bilər.

* Əslində özüm haqda danışmağı sevmirəm. İlk növbədə onu qeyd edə bilərəm ki, konsentrasiyası daim ən yüksək səviyyədə olan bir müdafiəçiyəm. Təbii ki, əsas işim müdafiə olunmaq və müdafiənin düzgün təşkil olunmasına yardım etməkdi. Bir müdafiəçi kimi həmişə etməyə çalışdığım şey oyunu oxumaqdı.

Müdaxiləni nə zaman etməli olduğumu çox vaxt düzgün müəyyənləşdirirəm. Bu özəllik həm də oyunu oxumağın bir parçasıdı. Müdafiədə ünsiyyət də çox önəmlidi. Müdafiəçilər öz aralarında çox yaxşı münasibət və ünsiyyət qurmalıdı. Düzdü, bu əslində komandadakı bütün oyunçular üçün keçərlidi. Amma müdafiəçilər üçün ikiqat önəmlidi. Birlikdə nə qədər çox oynasaz və bir-birinizi nə qədər çox tanısaz, meydanda anlaşma səviyyəsi bir qədər yüksək olacaq. Bəzən elə olur ki, meydanda ünsiyyət qurmağa vaxt olmur. Məhz belə anda yanındakı oyunçunun özəlliklərini bilməlisən ki, buna uyğun reaksiya verəsən. Komanda yoldaşlarınızı meydanda nə qədər çox tanısaz, sizin üçün işlər bir o qədər asanlaşacaq. Ünsiyyət səviyyəsini yalnız oynadıqca və zamanla artırmaq mümkündü.

* Hər oyunçunun tərzi fərqlidi. Amma mən oyunlardan öncə rəqib futbolçuları izləməyi, onların oyununu təhlil etməyi üstün tuturam. Bunun sayəsində həmin oyunçunun tərzini və güclü tərəflərini görmək mümkündü. Mən həmişə belə olmağa can atmışam.

* Mənə hər kəs, eləcə də komanda yoldaşlarım fanatlarımızın nə qədər çılğın olmasından bəhs edir. Məni ilk ev oyunumuzda stadionda olacaq atmosferə hazırlamağa çalışırlar. Bununla bağlı sosial şəbəkələrdə onsuz da çox video görmüşəm. Belə şeylər mənim həyəcanımı artırır. Çünki izləmək başqa, canlı yaşamaq başqadı. Bu təcrübəni canlı yaşayacağım anı səbirsizliklə gözləyirəm. Həm də transferim açıqlandıqdan sonra sosial şəbəkələrdə saysız-hesabsız ''xoş gəldin'' mesajları aldım. Buna görə də fanatlarımıza xüsusi təşəkkür edirəm. Onların bu isti münasibəti sayəsində ilk gündən özümü evdəki kimi hiss edirəm.

* Yeni mövsüm hər birimiz üçün böyük bir meydan oxumaq olacaq. ''Fənərbaxça''nın uzun illərdi çempion ola bilməməsindən xəbərdaram. Eyni zamanda uzun müddətdi Çempionlar Liqasının əsas mərhələsində iştirak edə bilmirik. Ona görə də ilkin hədəfimiz bu turnirdə əsas mərhələyə vəsiqə qazanmaq olacaq. Bunun üçün əlimizdən gələni edəcəyik. Ümumilikdə 4 turnirdə oynayacağıq. ''Fənərbaxça'' iştirak etdiyi bütün turnirlərdə yalnız qələbəyə oynayır. Amma indidən çox da uzağa boylanmağa ehtiyac yoxdu. Pillə-pillə irəliləyəcəyik. Təsnifat mərhələsində yaxşı performans sərgiləməliyik. Ondan sonra da çempionata uğurlu start verib, belə də davam etməliyik.

* Fanatlarımıza dəstəkləri üçün minnətdaram. Həmişə arxamızda durmaqda davam etsinlər. Biz onlar üçün və komanda üçün əlimizdən gələnin ən yaxşısını etməyə çalışacağıq. Ümid edirəm ki, hər birimiz eyni hədəfə köklənərək gözəl bir mövsüm keçirəcəyik.