Aslan Kərimov "Sabah"ı "Qəbələ"dən bir addım öndə hesab edir - AÇIQLAMA
Azərbaycan premyer-liqasının sonuna iki tur qalsa da, Konfrans Liqasına vəsiqə verən 3-cü və 4-cü yerlərin sahibləri müəyyənləşməyib.
"Football-plus.az" xəbər verir ki, hazırda "Zirə", "Qəbələ” və “Sabah" arasında ölüm-qalım savaşı gedir.
Görəsən, adıçəkilən klublardan hansılar bu mübarizədə daha şanslıdı? Məsələ ilə bağlı fikirlərini öyrənmək Aslan Kərimova müraciət etdik. Təcrübəli mütəxəssis bu yarışda "Sabah"ı "Qəbələ"dən üstün hesab edir:"Ümumilikdə hər üç komandanın həm 3-cü yeri, həm də avrokuboklara vəsiqəni təmin etmək şansı var. Futboçuların gücünə görə götürsək, "Sabah" daha şanslıdı. Komanda Murad Musayevin rəhbərliyi altında xarakter göstərərək bu yerə gəlib. "Zirə" iki cəbhədə mübarizə apardığından yorğunluq özünü göstərdi. Bu, "Qarabağ" və "Qəbələ" ilə matçlarda aşkar hiss olundu. "Zirə"ni qarşıda "Neftçi" və "Şamaxı" ilə ağır matçlar gözləyir. "Ağ-qaralar" son iki oyunda qələbə qazanıb adına uyğun mövsümə yekun vurmaq istəyirsə, "Şamaxı" uzun müddətdi davam edən qələbəsizlik həsrətinə son qoymaq üçün çarpışır. Yəni "Zirə"nin 3-cü yeri qoruması çox çətin olacaq. Bu mövsüm oyunu və nəticələri ilə hamını təəccübləndirən "Qəbələ" oldu. Çoxları kimi məni də bir məsələ düşündürürdü: ehtiyat oyunçular skamyası kasad olan "Qəbələ" hara qədər irəliləyəcək? Komandanın gücü qış fasiləsindən sonra tükənməyə başladı. Bölgə təmsilçisi ardıcıl məğlubiyyətlərlə 2-ci yerdən 5-ci pilləyə gerilədi. Son iki turunda rəqiblərini məğlub etsə də, “Qəbələ”ni qələbəyə daşıyan əsasən yaşlı və təcrübəli futbolçulardı. Təbbi ki, futbolda hər şey olur. "Qəbələ" bu mövsüm hamını təəccübləndirib qış fasiləsinə vitse-çempion kimi yollanıbsa, sürpriz edib avrokuboka da vəsiqə qazana bilər. Amma inanmıram ki, komanda qarşıdakı son iki matçda maksimum nəticə göstərsin. Odu ki, 3 klub arasında həm maliyyə gücünə, həm də futbolçuların performansına görə "Sabah"ı bir addım öndə görürəm".
ABDULLA İSMAYILOĞLU
