Aslan Kərimov: “Oyun “Zirə” üçün çox çətin keçəcək” - AÇIQLAMA
“Futbolçular cari mövsümün son oyununa çıxacaqlar. Düşünürəm ki, bu komandaların potensiallarını qarşılaşdırmaq üçün mütəxəssis olmağa ehtiyac yoxdu”.
Bu sözləri “Futbol+” qəzetinə açıqlamasında Aslan Kərimov deyib. Təcrübəli mütəxəssis bu gün keçiriləcək Azərbaycan kubokunun finalı haqda fikirlərini bildirib. Tərlan bəy Ağdam təmsilçisinin görüşün olduğunu dilə gətirib:
“Qarabağ” bunu oyunu ilə çempionatda sübut edib. Buna görə də, şübhəsiz, ağdamlılar görüşün favoriti sayılır. Qurban Qurbanov premyer-liqanın son matçında bütün əsas futbolçularını oynatdı. Bu da onların finala ciddi hazırlaşdığının göstəricisidi. “Qarabağ” ötən mövsüm çempionluğu əldən verəndən sonra cari “futbol ili”ndə hər iki titulu qazanmaq niyyətindədi. İtkiləri də yoxdu, tam heyətlə meydana çıxacaqlar. Ehtiyat qüvvələri də çox güclüdü. “Zirə”yə gəlincə, çempionatda bürünc medal qazandılar. Buna görə də onları təbrik etməliyik. Böyük uğura nail oldular. Kuboka gedən yolda “Neftçi” kimi nəhəngi uzaqlaşdırdılar. Baxmayraq ki, matçın favoriti “Qarabağ”dı, amma bu görüşlər çempionat oyunundan çox fərqlənir. Cəmi bir oyundan ibarətdi. Burda qapalı oyun göstərərək də kubok qazanmaq mümkün olur. Nə qədər çətin olsa da, “Zirə”nin yaxşı oyun sərgiləməklə rəqibinə başağrı ola biləcəyini düşünürəm. Əlbəttə, belə qarşılaşmalarda “Qarabağ” kimi komandaların hücum xəttini zərərsizləşdirmək, kiçik də olsa, səhvlərə yol verməmək, əks-hücumlarda kəsərli olmaq lazımdı ki, qalib gələsən. Əslində “qartallar” bunun öhdəsindən gələ bilər. Çünki Rəşad Sadıqov kimi baş məşqçiyə sahibdilər. “Qarabağ”ı tanıdığından fərqli strategiya seçə, bunun sayəsində də yaxşı nəticə əldə edə bilər. Amma sözsüz, kağız üzərində favorit Ağdam təmsilçisidi. Oyun “Zirə” üçün çox çətin keçəcək”.
Qeyd edək ki, “Qarabağ” - “Zirə” matçı bu gün saat 19.00-da Qəbələ şəhər stadionunda baş tutacaq.
SƏNƏM FƏRHADOVA
Digər xəbərlər
