“Sözsüz, bu mərhələdə zəif rəqib olmayacaqdı. Amma mənə elə gəlir ki, "Anderlext"dənsə, "Gent"in düşməsi bizə sərf edir. Hətta "Fiorentina” və "Bazel"lə müqayisədə “Gent” daha əlverişlidi. Əlbəttə, daha asan rəqiblər də düşə bilərdi. Ən azı tanıdığımız "Lex". Çünki onlarla rahat oynamışıq. "Partizan" da "Gent"dən daha sərfəli rəqib ola bilərdi.

Ortabab rəqibdi. Öz qrupunda 2-ci yeri tutub. 1-ci yer uğrunda mübarizəni İsveç təmsilçisinə uduzub. Məncə, bu onun göstəricisidi ki, onları Avropanın aparıcı klubları siyahısına daxil etmək olmaz. Bu komandayla oynamaq mümkündü. Oyun üslublarına baxsaq, mənim incələmələrimə görə, 3-ü mərkəz olmaqla 5-li müdafiə oynayırlar. Bakıda baş tutacaq 1-ci görüşdə biz daha dominant oyun nümayiş etdirəcəyik. Onlar bir az ehtiyatlı davranmaq məcburiyyətindədi. Çünki "Qarabağ"ın Avroliqadakı oyunlarını incələyiblər və hücum xəttinin güclü olduğunu bilirlər. Bu baxımdan sürətli hücum xəttimizə görə müdafiədə olacaqlar, daha çox önə sıxmaq istəməyəcəklər. Komandamızı 2-ci və ya 1-ci zonada qarşılayacaqlar. 5-li müdafiəyə qarşı oynamaq bizim üçün çətin olacaq. Amma hesab edirəm ki, top nə qədər “Qarabağ”ın nəzarətində olacaqsa, bir o qədər də qol şansı əldə edəcəyik. Sözsüz ki, "Gent"in daha çox-əks hücumlarda oynayacağını təxmin edirəm. Cütün qalibini dəyərləndirməli olsaq, məncə, “Qarabağ” 55-in 45-ə üstündü. Çünki bizim hücum xəttimiz həddən artıq güclüdü. Fərdi ustalığı yüksək olan Abdulla Zubir, Kadi Borqes, Kvabena Ovusu kimi oyunçular istənilən rəqibin müdafiəsini yara bilər. "Gent"lə oyun da istisna olmayacaq. Bu mərhələni keçməyə daha yaxın görünürük. Sözsüz, bu səviyyədə rəqibə "zəif" demək olmaz. Amma bundan zəif və ya güclü rəqiblər də ola bilərdi”.