Bütün dünyanın gözü hazırda Qətərdədi.

Asiyanın ən varlı ölkələrindən birində dünya çempionatı keçirilir. Artıq qrup mərhələsinin 1-ci turu arxada qalıb. Bəziləri Qətərdə keçirildiyi üçün mundiala maraq göstərmir. Lakin əksəriyyət Ronaldo və Messinin sonuncu dəfə çıxış edəcəyi yarışı həyəcanla izləyir.
Dünya çempionatları “transfer bazarı” baxımından da önəm daşıyır. Nisbətən zəif yığmaların futbolçuların burda özlərini göstərərək güclü çempionatların klublarına transfer olunur. Bu üzdən hazırda menecerlərin də diqqəti Qətərə yönəlib. Artıq iki sensasiyalı nəticə qeydə alınıb. Səudiyyə Ərəbistanı Argentinanı, Yaponiya isə Almaniyanı məğlub edib. Belə görünür ki, yenə qeyri-adi nəticələr qeydə alınacaq. Bu da zəif sayılan ölkələrin futbolçularının önə çıxmasına şərait yaradacaq. Görəsən, azərbaycanlı menecerlər DÇ-ni izləyirmi? Onlar mundialın, heç olmasa, bir görüşünə yerində canlı baxacaq? Bunun üçün imkan var? Suallarımızı ölkəmizdə fəaliyyət göstərən tanınmış menecerlərə ünvanladıq.

Tural Əsgərov: “Dünya çempionatı zamanı mən də sıravi azarkeşəm. İmkan tapdıqca oyunları izləyirəm. DÇ ilə bağlı başqa planım yoxdu. Hesab etmirəm ki, mundialın keçirilməsi bizim işlərə təsir göstərə. Prinsipcə oyunçunu gedib yerində canlı izləməyə ehtiyac yoxdu. Qətərə gedib nə edəcəm? Təsadüfən hansısa agent və ya klub nümayəndəsi ilə tanış olacağıq. Bu işləri Bakıdan da etmək olar. İstənilən vaxt onlarla əlaqə qurmaq olar. Buna görə dünya çempionatını gözləməyə və ya keçirildiyi ölkəyə səfər etməyə gərək yoxdu”.

Vaqif Heydərli: “Dünya çempionatının bütün oyunlarını izləyirəm. Maraqlı çempionatdı. Düzdü, qəribəliklərlə doludu, fərqli ölkədə və vaxtda keçirilir. Təbii ki, əvvəlkilərdən fərqlənir. Lakin futbol baxımından təxminən eynidi. Oyunçularla bağlı suala gəlincə, bir futbolçu var ki, əməkdaşlıq etdiyim şirkətin nümayəndəsidi. Adını deyə bilmərəm. Amma Cənubi Amerika ölkərindən birində çıxış edir. Klublarımızdan birinə təklif etmişik. Onunla maraqlanırlar, oyunlarına baxacaqlar. Bundan sonra fikir bildirəcəklər. Qətərə getməyi də planlaşdırıram. Ola bilər ki, növbəti mərhələnin iki qarşılaşmasını stadiondan izləyim. Lakin hansı oyunlar olacağını dəqiq deyə bilməyəcəm”.

Səbuhi Səfiyarlı: “DÇ-nin oyunlarını izləyirəm. Lakin hansısa futbolçuya görə yox. İşlə bağlı izləmirəm. Biz hələ o səviyyəyə çatmamışıq ki, DÇ-də çıxış edən futbolçularla danışıq aparaq. Mundialı izləmək üçün Qətərə gedəcəm, amma azarkeş kimi. Dünya çempionatının ab-havasını hiss etmək istəyirəm”.

Erkin İbrahimov: “Dünya çempionatı ilə bağlı hansısa iş görmürəm. Əvvəllər belə hadisələr olurdu. İnternet olmayanda hansısa oyunçu birdən üzə çıxırdı. İndi çoxlu skautinq proqramları var. Demək olar ki, bütün futbolçuları tanıyırıq. Açığı, bu daha çox klubların marağında olmalıdı. Onlar istəməlidi ki, futbolçuları DÇ-də oynasın. Çünki FİFA buna görə əlavə ödəniş edir. Düzdü, təmsilçilərimizin işinə qarışmaq istəmirəm. Amma onlar getməliydi. Çünki o qədər də yüksək məvacib almayan qanalı Bukari Portuqaliya ilə oyunda qol vurdu. Bu futbolçu “Srvena Zvezda”da çıxış edir. Konkret işlər görmək üçün yerində olmaq lazımdı. Nəsə mənim bu çempionata o qədər də marağım yoxdu. Ötən dəfə elə “feysbuk”da da bununla bağlı post yazmışdım. Ölkə kubokunun “Kəpəz” - “Sumqayıt” oyununa baxdım, amma DÇ-nin görüşünü izləmədim. Birinci qarşılaşma mənə daha maraqlıdı”.

İLKİN SULTANLI