Azərbaycanda dünya çempionatının yayın hüququ İctimai Televiziyaya (İITV) məxsusdu.

Football-plus.az xəbər verir ki, hələ bir neçə gün öncə telekanalın idman departamentinin direktoru Kənan Hakimova 7 sualla müraciət etmişdik. O isə bəzi məsələlərlə bağlı məlumatlı olmadıqlarını söyləmişdi. Baxmayaraq ki, həmin vaxt mundialın startına cəmi 6 gün qalırdı...

Detalların dəqiqləşdiyini düşünərək, dünən yenidən Hakimovla əlaqə saxladıq. Amma İTV-nin əməkdaşından bu dəfə də istədiyimiz cavabları ala bilmədik. Daha dəqiq desək, 3 sual cavabsız qaldı. Öyrənmək istədiyimiz məsələlər isə heç də qaranlıq qalacaq, qəliz deyildi. Birincisi, 64 oyunun neçəsi canlı, neçəsi videoyazı şəklində göstəriləcək? Əlbəttə, bütün futbolsevərləri düşündürən və dəqiqləşdirilməsi vacib olan detallardan biridi. Digər suallar isə qrup mərhələsinin 3-cü turu ilə bağlı idi. Məlumdu ki, son turda oyunların başlama saatı üst-üstə düşəcək. Belədə telekanal necə davranacaq, vəziyyətdən çıxış yolu tapılıbmı? Sublisenziya əsasında ölkənin başqa telekanallarını da bu işə qoşmaq olarmı? Həm maraqlı, həm də vacib detallardı. Bundan başqa, şərhçilərin kim olacağı, Qətərə yollanıb-yollanmayacaqları ilə də maraqlandıq. Təbii ki, artıq starta saatlar qaldığı üçün həmkarlarımızın Qətərə getməyəcəyini təxmin etmək mümkün idi. Hakimov bir neçə gün öncə 3 şərhçinin adını çəksə də, qalanlarının kimliyi barədə hələ də məlumatlı olmadıqlarını bildirdi. Yenə də əmin etdi ki, məsələ dəqiqləşən kimi əvvəlcə “Futbol+”ə məlumat verəcək. Bu söhbətin ertəsi “sirr pərdəsi” qaldırıldı. Biz isə bunu İTV-nin idman departamentinin direktorunun dilindən radioların birində eşitdik. Diqqətinizə çatdıraq ki, mundialın şərhçiləri “CBC Sport”dan Pərviz Musayev, Ramiz Mirzəzadə, Ramil Cahangirov, Gündüz Abbaszadə, Elnur Məmmədli, İTV-dən isə Tural Dadaşov, Ürfan Məmmədli və Əhməd Əliyev olacaq.

Bundan sonra yenə Hakimova müraciət etdik. Onun suallarımıza 3 gün ərzində verdiyi cavabları sizə təqdim edirik.

- Əvvəlcə bilmək istərdik, bu İTV-nin tarixində göstərəcəyi neçənci böyük turnir və neçənci dünya çempionatıdı?
- 2018-ci ildə mən İTV-də işə başlayanda dünya çempionatı yayınlanırdı. Ondan öncə də, səhv etmirəmsə, 2014-də olub, amma dəqiq bilmirəm. Çünki o vaxt burda işləmirdim.

- İTV-ni peyk üzərindən, kabel televiziyaları vasitəsilə izləyən tamaşaçılar oyunlara baxa biləcək, yoxsa bu mümkün olmayacaq?
- Bu dəfə İngiltərə premyer-liqası üçün olan sərt məhdudlaşdırıcı tələblər yoxdu. Bizə elə bir şey deməyiblər. Əvvəlki dünya çempionatlarında necə olubsa, indi də eyni qayda ilə olacaq.

- Şəhrçilərin kimliyi dəqiqləşdi? Bütün oyunlar studiyadan şərh olunacaq, yoxsa onlar Qətərə yollanacaq?
- Hansı şərhçilərin olacağı ilə bağlı dəqiq məlumatımız yoxdu. Lakin onu deyə bilərm ki, bizdən Qətərə yollanan olmayacaq.

- Azərbaycanlı tamaşaçıların Rusiya və Türkiyə kanallarını yox, məhz İTV-ni seçməsi üçün nə vəd edə bilərsiz?
- Bizdə “Bol futbol” verilişi olacaq. Oyundan əvvəl, sonra. Gündəlik icmallar da olacaq. Maraqlı, baxımlı qollar, oyunlar “yutub” kanalımızda operativ şəkildə yayınlanacaq. Televiziyada izləyə bilməyənlər kanalımızın “yutub” səhifəsindən baxa bilərlər.

ŞAİR ABDULLA