Dünya kuboku artıq Qətərdədi. Çərşənbə axşamı təşkilatçı ölkədə dünya çempionatının əsas qənimətinin təqdimatı keçirilib.

Football-plus.az xəbər verir ki, kubok planetin 51 dövlətinə, o cümlədən DÇ-2022-də komanda ilə təmsil olunan 31 ölkəyə “səyahət”ini başa vurandan sonra Qətərə gətirilib. Yerli QNA agentliyinin məlumatına görə, dünyanın hər yerindən Qətərə gələn azarkeşlər kuboku yaxından görmək üçün növbəyə düzülüblər. Qeyd edək ki, 1974-cü ildə xalis qızıldan hazırlanan qənimətin çəkisi 6,142 kiloqramdı. Dünya kuboku mundialın startına qədər Qətərdə bir sıra idarə, müəssisə və xeyriyyə təşkilatlarında nümayiş etdiriləcək.

DÇ-2022-nin final mərhələsi 20 noyabr -18 dekabr aralığında keçiriləcək.