“Bu hadisədən 6 ay sonra ÇL-in finalına təyinat aldım”
Türkiyənin Çexiyanı 2:1 hesabıyla məğlub etdiyi yoldaşlıq matçının əvvəllərində tarixi bir olay yaşandı.
İlk 5 dəqiqədə oyunu idarə edən Cüneyt Çakır daha sonra hər iki komandanın üzvlərinin, eləcə də stadiona toplaşan fanatların böyük alqış sədaları altında fitini şotlandiyalı Uilyam Kolluma verdi. Bununla da Çakır möhtəşəm karyerasını rəsmən başa vurdu. Bu, onun karyerasının sonuncu – 1679-cu qarşılaşması oldu. 1994-cü ildən hakim karyerasına start verən, 2001-dən etibarən superliqa oyunlarına təyinat alan və 2006-dan etibarən FİFA hakimi statusunda olan 46 yaşlı Çakır həqiqətən də Türkiyə hakimliyini tam yeni səviyyəyə daşımağı bacardı. 1 dəfə ÇL-in finalını, 1 dəfə AÇ-nin və 2 DÇ-nin yarımfinalını idarə edən Çakır 2021-ci ildə Beynəlxalq Futbol Tarixi və Statistikası Federasiyası tərəfindən keçirilən sorğuda XXI əsrin ən yaxşı 2-ci hakimi seçilmiş və yalnız almaniyalı Feliks Brıxdan geri qalmışdı. Əslində bu mundialda o, ardıcıl 6-cı nəhəng turnirə təyinat alan tarixdəki ilk hakim ola bilərdi. Amma bəzi məlum və qalmaqallı səbəblər üzündən bu baş vermədi. Yeri gəlmişkən, Qaziantepdə bir məqam diqqətdən qaçmadı. Türkiyə Futbol Federasiyası nədənsə bu vidanı yalnız Cüneyt Çakır üçün təşkil edərək uzun illər onunla yanyana bütün oyunlara təyinat almış köməkçiləri Bahattin Duranla Tarık Onqunu unutdu! Bu hakimləri ən azı stadiona dəvət etmək və bir hədiyyə verib onlarla da normal vidalaşmaq olardı. Amma Çakır özü də 13 il onun köməkçiləri olmuş bu tandemin unudulmasına göz yumdu.
Final fitindən sonra türkiyəli həmkarlarımıza açıqlamalar verən səbəbkar bunları dedi:
“Yığmamızı təbrik edirəm. Bu gün qalib gəlməklə AÇ-2024-ün seçmə mərhələsindən öncə bizi ümidləndirdilər. İnanıram ki, final mərhələsinə vəsiqə qazanacaqlar və biz də qürurla onları dəstəkləyəcəyik. Bu gün mənim üçün çox önəmli bir gündü. Tək mənim üçün yox, bütövlükdə Türkiyə hakimliyi adına qürurverici bir gündü. Bəlkə də dünyada bir ilk reallaşdı. Bu cür şəkildə hakimliklə vidalaşan olmamışdı. Ona görə də çox həyəcanlıyam və duyğularım bir-birinə qarışıb. Bu cür sevgiyə layiq olmağım mənim üçün fəxrdi. Əslində uşaq vaxtı futbolçu olmaq istəyirdim. Amma atamın hakim olması məni bu sahəyə gətirdi. Bir işə başladınsa, onu böyük istək və ehtirasla görmək lazımdı. İnsanlar biz hakimləri çox da yaxşı tanımır. Çünki bizi yalnız oyunlarda görürlər. Amma mən uşaqlıqdan futbolu dəlicəsinə sevmişəm. Öz çempionatımızın qədrini bilməliyik. Topun oyunda qalma müddəti baxımından premyer-liqa və ÇL kimi turnirlərlə müqayisə etmək istəməzdim. Amma superliqamız digər çempionatlarla eyni səviyyədədi. Düzdü, az tənqid olunmadım. Tənqiddən qorxmaq lazım deyil. Amma hər zaman insanlardan böyük hörmət gördüm. Bizim nəhəng turnirlərdə təmsil olunmağımız çox vacibdi. DÇ-də biz 2 milyard insanın izlədiyi bir oyuna təyinat alanda futbolsevərlər məndən “Cüneyt Çakır” kimi yox, “türk hakim” deyərək bəhs edirlər. Karyeramın, şübhəsiz, ən önəmli oyunu 2015-də “Barselona” ilə “Yuventus” arasındakı ÇL-in final matçıdı. Həm də ona görə ki, həmin mövsüm ciyərimdən ciddi bir xəstəlik keçirmişdim. Hətta karyeramın bitəcəyini söyləyənlər də var idi. Amma bu hadisədən 6 ay sonra ÇL-in finalını idarə etdim. Ötən mövsümün ikinci dövrəsində yaşananlar üzücüdü. Amma Türkiyə xalqı nəyin necə olduğunu gözəl bilir. Federasiyanın indiki başqanı Mehmet Büyükekşinin inanılmaz planları var. Ona qarşı səbirli olsaq, tək hakimliyimiz yox, futbol özü də irəliləyəcək. Hakimlər Komitsəində heç bir vəzifədə işləmirəm və məsləhətçi deyiləm. Amma əcnəbi VAR hakimlərinin dəvət olunması mövzusunda fikrimi öyrənsələr, təbii ki, böyük məmnuniyyətlə təcrübəmi onlarla bölüşərəm”.
Digər xəbərlər
