Daxili çaxnaşmalar üzündən son dönəmlərdə geriyə gedən Türkiyə hakimliyindən xoş xəbər var.

Belə ki, Cüneyt Çakıra uzun müddət sonra Avropada oyun verilib. Türkiyənin dünyaca ünlü hakimi sabah Millətlər Liqasında A liqasının 2-ci qrupunda, 3-cü tur çərçivəsində Malaqada keçiriləcək İspaniya - Çexiya oyununa təyinat alıb. Xatırladaq ki, 46 yaşlı ədalət təmsilçisi martda Türkiyə Hakimlər Komitəsi tərəfindən hakimlikdən kənarlaşdırılmış, qurumun rəhbərliyi dəyişənə qədər oyunlara təyinat almamış və bu rüsvayçılıq ona DÇ-2022-dən kənar qalmaq bahasına başa gəlmişdi. Halbuki bu hadisə olmasa, Çakır futbol tarixində ardıcıl 6 nəhəng turnirə təyinat alan ilk hakim olacaqdı. Bununla da Çakırın beynəlxalq arenadakı 115 günlük həsrəti başa çatacaq. O, Avropada son oyununu fevralın 17-də idarə etmişdi. Həmin vaxt Çakır Almaniyada AL-in pley-offu çərçivəsində ''Leyptsiq'' - ''Real Sosyedad'' görüşündə fit sahibi olmuşdu. Türkiyənin digər FİFA hakimi Xəlil Umut Melərə də oyun verilib. Bu hakim bu gün Rotterdamda keçiriləcək Niderland - Polşa qarşılaşmasına təyinat alıb. Bu komandalar ML-də A liqasının 4-cü qrupunda çıxış edirlər. Maraqlıdı ki, Türkiyə Futbol Federasiyasının Cüneyt Çakıra qarşı ayrı-seçkiliyi diqqət çəkib.

Belə ki, qurumun rəsmi saytında Melərə oyun verilməsi barədə xəbər yerləşdirilsə də, orda Çakır barədə heç bir xəbər yox idi! Həmin xəbər TFF-nin saytına yalniz dünən axşam saatlarında yerləşdirildi.