Türkiyənin ən tanınmış hakimlərindən olan Cüneyt Çakırın yeni işi bəlli olub.

"Footbal-plus.az" xəbər verir ki, 46 yaşlı ədalət təmsilçisi Türkiyə Futbol Federasiyası ilə hələ birillik müqaviləsinin olmasına rəğmən, avqustda sürpriz şəkildə karyerasını bitirdiyini açıqlamışdı. Çakıra xarici ölkələrdən Hakimlər Komitəsinin sədrindən tutmuş baş məsləhətçisinə qədər bir çox vəzifə üçün təkliflər gəlmişdi. Amma ünlü hakim bu təkliflərin hamısını geri çevirərək Türkiyədə qalmağa üstünlük vermişdi. Bu arada “Sabah” nəşrinin yazdığına inansaq, Çakır TFF ilə anlaşaraq yeni işinə başlayıb. Bundan sonra o, hakimlərin təlimi ilə məşğul olacaq. Xəbərdə hətta Çakırın aylıq qazancı da qeyd olunub. Sabiq hakim yeni işində aylıq100 min lirə (təxminən 9150 manat) qazanacaq.

Bununla bağlı xəbərdə diqqətçəkən daha bir məqam odu ki, Çakır hər həftə superliqa matçlarına da gedəcək və buna görə də əlavə 10 min lirə qazanacaq. Amma onun oyunlara nəyə görə və hansı statusda gedəcəyi haqda məlumat verilmir. Xatırladaq ki, Türkiyə futbol tarixində ən güclü karyeraya malik, ÇL-in finalı da daxil olmaqla 3 qitədə, 38 ölkədə ümumilikdə 366 oyun idarə edən Çakır martda böyük haqsızlıqla üzləşmişdi. Hakimlər Komitəsinin əvvəlki rəhbərliyi Çakır da daxil olmaqla 13 hakimi birdəfəlik futboldan kənarlaşdırmışdı. Komitənin rəhbərliyi dəyişdikdən sonra haqq-ədalət bərpa olundu və Çakır geri döndü. Ötən mövsümün sonlarına yaxın o, yenidən oyunlara təyinat aldı. Amma yayda əvvəlcə Çakırın uzun illər köməkçiləri olmuş Bahattin Duranla Tarık Onqun, sonra da ünlü referi özü karyerasını bitirdiyini açıqladı.