Müasir futbolun ən tanınmış hakimlərindən olan, amma bir müddət öncə sürpriz şəkildə karyerasını başa vurduğunu açıqlayan Cüneyt Çakır ilə bağlı Türkiyə Futbol Federasiyasının maraqlı bir ideyasının olduğu üzə çıxıb.

Football-plus.az xəbər verir ki, avqustun əvvəllərində belə desək fitini mismardan asmaq qərarına gələn 46 yaşlı Çakır bu yaxınlarda hakimlərin təlimçisi vəzifəsinə gətirilmişdi. Bu arada ''Milliyət'' nəşrinin xəbərinə görə TFF ölkə futbolunun ən tanınmış simalarından biri ilə ona layiq şəkildə vidalaşmağa hazırlaşır.

Bilindiyi kimi noyabrın 16-da Diyarbəkirdə Türkiyə ilə Şotlandiya yığmaları arasında yoldaşlıq oyunu keçiriləcək. Deyilənə görə, TFF bu matçı bir növ Çakırın vida oyunu etmək istəyir. Hakimə ilk 10 dəqiqədə oyunu idarə etmək və ardından alqış sədaları ilə adına yaraşan tərzdə futbolla vidalaşmaq təklif olunub. Düzdü, Çakır özü bu ideyanın əleyhinə deyil. Amma UEFA-nın, eləcə də qurumun Hakimlər Komitəsinin sədri Roberto Rozettinin bu təklifə necə cavab verəcəyi bilinmir.