“Bu hadisə indi yox, 2 ay əvvəl baş verib. Filmi əvvəlcə Beşiktaşda çəkmək istəyirdik. Amma orda insanların çox böyük maragı ilə üzləşdiyimizdən Kilyos qəsəbəsinə yollandıq. Bir qəhvəxanada oturduq. İnsanlar bizi gözəl qarşıladılar və şəkil çəkdirmək istəyənlər çox idi. Sonra Numanın olduğu səhnə üçün hazırlaşmağa başladıq. Bu məqamda gənc bir oğlan ona yaxınlaşaraq şəkil çəkdirmək istədi. Numa da onun istəyini geri çevirmədi. Amma şəkil zamanı həmin oğlan “Beşiktaş”ın embleminin üstündəki 3 ulduzun yanında əli ilə “4” işarəsini göstərdi. Bu da “Qalatasaray”ın ulduzlarının sayıdı. Paskalın bu hərəkət xoşuna gəlmədi və onun əlini itələməyə çalışdı. Amma həmin gənc yenidən əlini ora tərəf uzadanda Numa refleks olaraq sağ əli ilə onu üzündən itələməyə çalışdı. Vəssalam. Bundan başqa heç bir döymə, barmaq qırmaq kimi şeylər baş verməyib. Mən bir qədər kənardaydım və hadisəni eşidən kimi ora yollandım. Bu cür qanqaraldıcı hadisənin yaşanmasını istəməzdik. Çünki orda insanlar bizi yaxşı qarşılamışdı. Orda olan hadisənin şahidləri ilə danışdım. Hamısı Numada heç bir günahın olmadığını, həmin gənc oğlanın onu təxribata sürüklədiyini dedilər. Sonra həmin şəxsin polisə şikayət etdiyini öyrəndik. Ardından polislər gəldi və hamımız birlikdə bölməyə yollandıq. İnanın ki, polis bölməsində də bizi çox xoş qarşıladılar. Hətta orda da Numa ilə şəkil çəkdirmək istəyənlərin sayı çox idi. Sonra şikayət edən həmin şəxslə telefonda söhbət edib məsələn öz aramızda həll etmək istədik. Amma zənglərimizə cavab vermədilər. Sonradan öyrəndik ki, qarşı tərəfin məqsədi tam başqa imiş. Onlar hadisənin mümkün qədər ictimailəşməsi və bundan özləri üçün bir mənfəət əldə etmək arzusunda idilər. Olayın ardından filmin çəkilişlərini davam etdirdik. Üstündən iki ay ötdükdən sonra birdən-birə bu xəbər mətbuatda yayıldı. Çox təəccübləndik. Böyük ehtimalla polis idarəsində çalışan müxbirlər dosyeni incələdikdən sonra onu mətbuata ötürüblər”.