FİFA bu il noyabrın 21-dən dekabrın 18-nə qədər Qətərdə keçiriləcək dünya çempionatında fit sahibi olacaq hakimlərin yekun siyahısını açıqlayıb.

Siyahıya 36 əsas, 69 köməkçi və 24 video köməkçi olmaqla ümumilikdə 129 hakimin adı düşüb. Bəribaşdan qeyd edək ki, məlum hadisələr üzündən, gözlənildiyi kimi, siyahıda Rusiyadan heç bir hakim yoxdu. DÇ-2018-də Rusiyanı Sergey Karasyov təmsil etmişdi.

Amma ən qanqaraldıcı məqam odu ki, siyahıda dünyaca ünlü türkiyəli hakim Cüneyt Çakırın adı yoxdu. Bu da o deməkdi ki, mundialda heç bir türkiyəli hakim yer almayacaq. 45 yaşlı ədalət təmsilçisi bununla da adını futbol tarixinə yazdırmaq fürsətini əldən verdi. Son 3 AÇ-nin və 2 DÇ-nin hamısının iştirakçısı olan Çakır futbol tarixində ardıcıl 6 nəhəng turnirə təyinat alan ilk ədalət təmsilçisi ola bilərdi! Amma karyerası ərzində ÇL-in finalı da daxil olmaqla bir çox önəmli qarşılaşmaya təyinat alan, ümumilikdə 619 oyun idarə edən və Türkiyə hakimliyinin bir nömrəli markası sayılan Çakır faktiki Türkiyə Futbol Federasiyasının güdazına getdi. Çünki Hakimlər Komitəsinin bir qədər kobud dildə desək, ağlı başında olmayan sabiq başqanı Fərhat Gündoğdu martın 8-də Çakır da daxil olmaqla 12 hakimi ömürlük futboldan kənarlaşdırarkən buna həm federasiyanın o dönəmdəki başqanı Nihat Özdəmir, həm də vitse-prezident (indiki müvəqqəti prezident) Sərvət Yardımcı göz yummuşdu. Gündoğdu kimlərinsə tapşırığını yerinə yetirdikdən sonra istefa verdi və onu əvəzləyən Səbri Çəlik “qara siyahı”dakı hakimləri geri qaytardı. Çakıra da təxminən ayyarımlıq fasilədən sonra oyun verildi. Amma nə faydası? Öz ölkəsinin güvənini qazana bilməyən bir hakimin FİFA-nın etimadını qazana bilməməsi təəccüblü olmadı. Halbuki Çakırın adı DÇ-2022-yə namizəd olan hakimlərin ilkin siyahısında var idi!

Onu da bildirək ki, mundialda oyun idarə edəcək hakimlərin siyahısına tarixdə ilk dəfə qadınlar da salınıb. Bu futbol bayramında xanımlardan fransalı Stefani Frappar, ruandalı Salima Mukansanqa, yaponiyalı Yoşimi Yamaşita əsas, braziliyalı Neuza Bak, meksikalı Karen Dias Medina və amerikalı Ketrin Nesbitt isə köməkçi hakim kimi oyunlara təyinat alacaq.