Bu gün Avropa Liqasının qrup mərhələsinin 5-ci turunun oyunları keçirilib.

Turnirdəki yeganə təmsilçimiz “Qarabağ” “Nant”ın qonağı olub. Görüş meydan sahiblərinin qələbəsi ilə yekunlaşıb - 2:1.

Avropa Liqası
G qrupu, 5-ci tur
Nant (Fransa) – QARABAĞ 2:1
L. Blas, 16, İ. Qanaqo, 90+4 - F. Ozobiç, 56 (p.)
“Nant”: 1. Alban Lyafon (k), 3. Andrey Cirotto,5. Pedro Çirivelya, 7. Evann Gessan,8. Samüel Mutussami, 10. Lüdovik Blas, 21. Jan-Şarl Kastelletto, 24. Sebastyan Korşya, 29. Kenten Merlen, 31. Mustafa Məhəmməd, 55. Abdul-Kader Bamba.
Ehtiyat oyunçular: 16. Remi Deskam, 30. Denis Petriç 11. Markus Koko, 2. Fabio, 4. Nikolya Pallua, 14. İqnatius Qanaqo, 17. Mussa Sissoko, 27. Moyzes Simon, 12. Dennis Appia, 19. Mohammed Açi, 22. Qor Morvelyan.
Baş məşqçi: Antuan Kombuare.
“Qarabağ”: 1. Şahruddin Məhəmmədəliyev, 7. Riçard Almeyda, 13. Bəhlul Mustafazadə, 29. Marko Veşoviç, 2. Qara Qarayev (k), 10. Abdullah Zubir, 20. Kadi Borqes, 11. Ovusu Kvabena, 19. Filip Ozobiç, 27. Toral Bayramov, 81. Kevin Medina.
Ehtiyat oyunçular: 23. Luka Quqeşaşvili, 89. Amin Ramazanov, 30. Abbas Hüseynov, 18. İsmayıl İbrahimli, 22. Musa Qurbanlı, 90. Nəriman Axundzadə, 6. Julio Romao, 77. Ramil Şeydayev, 44. Elvin Cəfərquliyev, 8. Marko Yankoviç, 4. Rahil Məmmədov, 5. Maksim Medvedev.
Baş məşqçi: Qurban Qurbanov.
Hakimlər: YAKOB KEHLET, Lars Hummelqard, Viktor Skite, Yorgen Burçard (hamısı Danimarka).
VAR hakimi: Yeroen Manskot (Niderland).
VAR hakiminin köməkçisi: Rob Diperink (Niderland).
Hakim-inspektor: Peter Sippel (Almaniya).
UEFA nümayəndəsi: Amil Gerina (Monteneqro).
27 oktyabr. Nant. “Bojuar” stadionu. Saat 23.00

Bu görüş Azərbaycan çempionu üçün olduqca vacibdi. “Qarabağ” tarixlərində ilk dəfə Avropa Liqasının pley-offuna vəsiqə qazana bilər. Bunun üçün səfərdən 1 xalla dönmək də kifayətdi.

Ümumiyyətlə, “Nant” bu turnirə təsadüfən vəsiqə qazanıb. Düzdü, “bülbüllər”in qızıl dövrünü xatırlayanlar var. Amma həmin vaxtdan iki onillik ötüb. Elə ötən mövsümdə də yalnız kubokda uğur əldə olundu. 2001-ci ildən sonra qazanılan ilk mükafat komandanı avrokuboklara daşıdı. Amma “bülbüllər” hazırda Liqa 1-də 9-cu yerdə qərarlaşıb. Yəni cari mövsümd’ daxili arenada işlər daha pis gedir.
Avropa Liqasının səviyyəsi ilə ayaqlaşmaq da “Nant”ın potensialına uyğun deyil. Öz meydanında ulduzlardan ibarət “Olimpiakos” üzərində qələbə ilə başlayan qrup mərhələsi ardıcıl üç “quru” məğlubiyyətlə davam etdi. Pley-off şansı, demək olar ki, möcüzəyə bağlı olan komanda əsasən üçüncülük uğrunda mübarizə aparır.

“Qarabağ” isə avrokubokların möhkəm döyüşçüsü statusunu təsdiqləməkdədi. “Köhlən atlar” Azərbaycan futbolunun liderinə çevrilib. Qurban Qurbanovun komandası Avropa Liqasına “Frayburq”a səfər məğlubiyyətiylə başlasa da, sonra toparlanmağı bacardı. “Nant”ı evdə, “Olimpiakos”u səfərdə darmadağın edən təmsilçimiz üçün Yunanıstan təmsilçisi ilə Bakıdakı qolsuz heç-heçə aşkar uğursuzluğa bənzəyirdi. Buna baxmayaraq, yenə də komandanın pley-off şansı böyükdü.
Hər iki komandanın heyətində zədəli futbolçular var. “Nant”ın müdafiəçisi Fabyen Sentonz zədəsini sağaldıb. Futbolçu komanda ilə birgə məşqlərə də başlayıb. Baş məşqçi Antuan Kombuare şans versə, bugünkü oyunda meydana çıxacaq. Amma təcrübəli mütəxəssis Şarl Traorenin xidmətindən yararlana bilməyəcək. Malili sol cinah müdafiəçisi hələ də bərpa prosesi keçir və bu gün Kombuarenin sərəncamında olmayacaq. Ağdam təmsilçisində isə Bədavi Hüseynovla Şahruddin Məhəmmədəliyev “Turan Tovuz”la son qarşılaşma ərəfəsində zədələnmişdi. Hər iki futbolçu son 2 məşqi buraxsa da, onların bu gün meydanda olacağı gözlənilir.

Maraq üçün qeyd edək ki, oyunu danimarkalı Yakob Kehlet idarə edəcək. 42 yaşlı referi bundan əvvəl də ağdamlıların görüşünə təyinat alıb. Kehlet 2015/16 mövsümündə "Qarabağ"ın Avropa Liqasının qrup mərhələsində "Monako"ya qarşı keçirdiyi oyunu da idarə edib. Fransa klubunun qələbəsiylə (1:0) başa çatan görüşdə "Qarabağ"ın 1, "Monako"nun isə 2 futbolçusuna sarı vərəqə göstərib. Kehlet Azərbaycan klubunun 2020-ci ildə Avroliqanın qrupunda "Sivasspor"a qarşı keçirdiyi matçda da ədaləti qoruyub. "Köhlən atlar" həmin görüşdə də uduzub - 2:3. Referi bu dəfə "Qarabağ"ın 2, "Sivasspor"un 3 futbolçusunu cəzalandırıb. Danimarkalı referi 2015-də, yenə Avropa Liqasının qrup mərhələsində "Qəbələ"nin PAOK ilə səfər oyununa təyinat alıb. Həmin görüş 0:0 hesabıyla başa çatıb.