“Qəbələ” ardıcıl üçüncü oyunda qələbəyə həsrət qaldı.

Bölgə təmsilçisi son qələbəsini 8-ci turda “Səbail” üzərində qazanıb. Özü də səfərdə. Bundan sonra “Qarabağ”la “Kəpəz”i doğma meydanda qəbul edib, “Şamaxı” ilə səfərdə qarşılaşıb. “Qarabağ”la qarşılaşmanı bir kənara qoymaq mümkündü. Ona görə ki, “köhlən atlar” Misli premyer-liqasında rəqib tanımır, itkisiz irəliləyir. Ağdamlılarla görüş çempionatın iştirakçıları üçün ölçü vahidi sayılmır. Qəribəsi odu ki, “Qəbələ” çempiona qarşı yetərincə yaxşı oyun sərgiləmişdi, Ozobiçin vurduğu qol da kuryoz alınmışdı. Bu görüşdə sərgilənən performansa yaxşı qiymət vermək mümkün idi, baxmayaraq ki, nəticədə “Qəbələ” xalsız qalmışdı. Amma nə “Şamaxı”, nə də “Kəpəz” ilə oyundakı xal itkilərinə bəraət tapmaq, məntiqli izah vermək mümkündü. “Qəbələ” qalib gəlməyə borclu olduğu iki görüşdə cəmi 1 xal qazandı.

Bu yerdə xatırladım ki, ilk dövrədə keçirilən oyunlarda “qırmızı-qaralar” həm “Şamaxı”nı, həm də “Kəpəz”i məğlub etmişdi. “Şamaxı”nı 3:1 hesabıyla üstələyən “Qəbələ” “Kəpəz”i üç cavabsız qolla yenmişdi. Təkcə bu hesablara yox, elə heyətlərin müqayisəsinə baxsaq, “Qəbələ”nin hər iki rəqibdən üstün olduğunu görürük. “Şamaxı” premyer-liqada legionerlər olmadan, tam yerli futbolçulardan ibarət heyətlə mübarizə aparır. “Kəpəz”i də elitaya tələm-tələsik buraxıblar, Gəncə təmsilçisi hələ də heyətini komplektlərşdirməyə çalışır, güclənmək üçün cəhdlər edir. Bütün bu məqamları göz önünə gətirib, sadə bir müqayisə aparanda “Qəbələ”nin hər iki rəqibini dəfələrlə üstələdiyini görürük. “Kəpəz”lə oyundakı xal itkisi “qırmızı-qaralar”ın turnir cədvəlindəki yerinə də təsir göstərdi. Elmar Baxşıyevin çalışdırdığı komanda artıq “Zirə”ni özündən irəli buraxıb, turnir cədvəlində 5-ci pillədə yer alır.

Bəli, etiraf etmək lazımdı ki, “Şamaxı” ilə oyunda “Qəbələ” hakim haqsızlığına məruz qaldı. Görüşün son saniyələrində top cərimə meydançasında Cəlal Hüseynovun əlinə dəysə də, Rauf Allahverdiyev penalti təyin etmədi. Maraqlıdı ki, baş hakim qəti qərar vermək üçün VAR-a baxmağı da lazım bilmədi. Sanki “Qəbələ”nin son saniyələrdə qələbə topunu vurması kimlərinsə marağına uyğun deyilmiş. Amma bu faktın özü belə Elmar Baxşıyev və onun yetirmələri üçün bəraət sayılmamalıdı. Onlar işi penaltiyə saxlamamalıydılar. Zəif rəqiblə oyunda bir qol vurub, işi bitmiş saymaq olmazdı. Qonaqlar hesabı açandan sonra 3 xalın ciblərində olduğunu düşündülər və gənc Kamran Quliyevin qolu onların bu arzusunu gözündə qoydu. Həmin qarşılaşmadan sonra Elmar bəy süni örtük amilini önə çəkib, legionerlərinin oyununun alınmamasını bununla əlaqələndirmişdi. Sitat: “Süni örtükdə oynamaq bir qədər ağırdı. Təbii otda hazırlaşırıq. Ona görə belə problem yaranır”.

“Şamaxı” ilə oyun səfərdə, özü də süni örtükdə keçirilmişdi. “Kəpəz”i isə “Qəbələ” doğma meydanında qəbul edirdi. Təbii ot, “doğma divarlar” da “qırmızı-qaralar”ın işinə yaramadı. Özü də budəfəki ssenari də Şamaxıdakı oyunu xatırlatdı. Yenə də “Qəbələ” hesabı açdı və bundan sonra arxayınlıq yarandı. Halbuki təzyiqi davam etdirib, hesabdakı üstünlüyü artırmaq lazım idi. Əvəzində “Kəpəz” daha inamlı oynamağa, fürsət axtarmağa başladı. Həmin fürsət də Fərid Nəbiyevin əlinə düşdü. Uzaqdan “çərçivə”yə gələn topa Səlahət Ağayev yetişə bilmədi. Qoldan sonrakı fəallıq isə yetərincə deyildi. Çünki hesabın bərabərləşməsi “Kəpəz”ə psixoloji üstünlük vermişdi, gəncəlilər ayrı-ayrı epizodlarda daha inamlı görünürdülər. “Qəbələ”nin hücumlarında qətiyyət çatmırdı. Sanki legionerlər meydanda ayağını sürüyür, 90 dəqiqənin başa çatmasını gözləyirdilər.

“Kəpəz”in kapitanı Tural Axundov artıq neçənci görüşdü ki, meydana artıq çəki ilə çıxır. Kənardan bunu görmək çox asandı. Tərlan Əhmədovun onu məcburiyyətdən meydana buraxdığı məlum məsələdi. Çünki onu əvəzləməyə başqa futbolçu yoxdu. Obrazlı desək, Axundov artıq çəki ilə “Qəbələ”nin legionerlərindən yaxşı oynayır, daha çox mübarizə aparır. Deməli, Elmar Baxşıyevin süni örtükdən, havadan-sudan şikayətlənməsi bəhanədi. Çalışdırıcı xüsusilə əcnəbilərə sərt üzünü göstərməli, onlardan daha yaxşı oynamağı, meydanda can qoymağı tələb etməlidi. Oynamaq istəməyənlərə qapını göstərmək vaxtıdı!

AMAL