Todd Bouli “Çelsi”də yenidənqurmanı davam etdirir.

Baş məşqçi dəyişikliyindən sonra növbəti hədəf yeni idman direktoru tapmaqdı. Çox fərqli adlar çəkilir, ancaq hələ ki bu yöndə nəticə yoxdu.

• Bouli lap əvvəldən gözünü Maykl Edvardsa dikmişdi – o, “Liverpul”da möhtəşəm işlər görüb. Amma bu ilin yayından işsizdi, necə deyərlər, azad agentdi. İnsayder Fabritsio Romanoya inansaq, Bouli bir neçə dəfə Edvardsla görüşüb, “Çelsi”yə keçmək üçün dilə tutmağa çalışıb. Maykl imtina edib, ən azı bir il futboldan kənarda qalmaq istəyir.

• Romano sentyabrda yazırdı ki, “Çelsi” “Zaltsburq”dan Kristof Froyndla anlaşmanın biraddımlığındadı. Bu adam vaxtilə Holann, Mane və Upamekanonu transferinə yardım edib, Bouli “Red Bull” modelinin fanatıdı. Bundan başqa, avstriyalının namizədliyini yeni baş məşqçi Qrehem Potter də dəstəkləyirdi. Ancaq tezliklə Froynd özü etiraf etdi ki, “Çelsi”yə “yox” cavabı verib: “Bəli, deyilənlər doğrudu, biz danışıq apardıq. Belə böyük klubun mən və “Zaltsburq”da gördüyüm işlər ilə maraqlanması xoşdu. Ancaq belə nəticəyə gəldim ki, “Zaltsburq”da etibarlı əllərdəyəm, klubu dəyişməkdən söhbət belə gedə bilməz”.

• Son günlərdə isə tez-tez “Bayer-04”ün idman direktoru Tiç Ştaydtenin namizədliyi haqda danışılır. O, yaya qədər Leverkuzen klubunda şef-skaut (2019-a qədər “Verder”də bu vəzifəni tutub) kimi çalışıb. Cəmi bir neçə ay əvvəl isə “Bayer”in idman direktoru təyin olunub.

“Sky Sports” xəbər verir ki, “Çelsi” artıq 43 yaşlı alman mütəxəssislə təmas qurub. Londonlular bu yay Hadson-Odoinin icarəsini razılaşdırarkən Ştaydtenin işi ilə bağlı müəyyən təsəvvürlərə yiyələnib. “Çelsi”ni qane edən əsas məqam budu ki, almaniyalı bütün göstəricilərin təhlilinə əsalanır, axı London klubuna da müasir düşüncəyə malik adam lazımdı.

• Amerikalı sahiblər idman direktoru vakansiyasını dünya çempionatının startına qədər doldurmaq istəyirdilər ki, yeni kadr turnirdə parlaya biləcək futbolçuları gözdən keçirsin. Ancaq Froyndun imtinasından sonra Boulu tələsməməyə və daha bir neçə mütəxəssislə danışıq aparmağa qərar verib. Onlar arasında “Lids”dən Viktor Orta, “Arsenal”dan personal seçimi bölməsinin rəhbəri Li Konherton (marta qədər “Lester”də eyni vəzifəni tutub), “Sevilya”dan Monçi, “Benfika”dan Ruy Pedro Braz da var. Bir müddət əvvəl isə PSJ-dən Luiş Kampuşun, “Atletiko”dan Andrea Bertenin və “Monako”dan Pol Mitçellin adı çəkilirdi.
Hələ ki Bouli özü idman direktorunun işini görür
“Çelsi” premyer-liqada idman direktoru olmayan nadir klublardan biridi. Maykl Emenalo 2017-ci ildə qovulandan sonra bu funksiyanı direktor Marina Qranovskaya, texniki məsləhətçi Petr Çex (2019-da kluba qoşulmuşdu) və baş məşqçidən ibarət transfer komitəsi yerinə yetirirdi. Sahiblər dəyişəndən sonra Qranovskaya, Çex və Roman Abramoviçin başqa adanları “Çelsi”ni tərk etdi, iyunun 22-də isə London klubu bu açıqlamanı yaydı: “Klub layiqli əvəzedici tapana qədər Bouli idman direktorunun səlahiyyətlərini yerinə yetirəcək”.

Yayda artıq sabiq baş məşqçi Tomas Tuxel hansısa futbolçuları məsləhər görür, onlarla danışıqları Bouli özü aparırdı. Ancaq bu tandemin işində dərhal problemlər üzə çıxdı:

• Bouli indiyə qədər heç vaxt hansısa idman layihəsində operativ idarəçiliyə belə sıx cəlb olunmayıb, onun futbolda danışıqlar aparmaq və qərar qəbuk etmək təcrübəsi yoxdu. Bu üzdən hətta ən adi vəziyyətlərdə də özünü qəribə aparırdı. Məsələn, Rafinyanın əvəzində “Lids”ə bir neçə futbolçu təklif etmişdi. Ümumiyyətlə, Şimali Amerika liqalarında olduğu kimi, əsasən futbolçu almağı yox, mübadilə etməyi planlaşdırırdı. Tezliklə bu ideyadan imtina etməli olsa da, fakt özü hər şeyi açıq-aydın göstərir.

• Tuxel qovulandan sonra “The Guardian” yazırdı ki, baş məşqçi Qranovskaya ilə Çex gedəndən bəri klub rəhbərliyindən təcrid olunub. Halbuki almaniyalı mütəxəssis “Çelsi”dəki işinin ilk ilində adı çəkilən şəxslərlə yaxşı anlaşırdı.
Tuxel yayda De Liqt, Rafinya, De Yonq və Kimpembeni istəsə də, bunlardan heç birini transfer etmək mümkün olmadı. Kriştiano Ronaldo ilə bağlı tarixçə də vəziyyətə təsir etdi. Baş məşqçinin böyük kommersiya potensialına malik portuqaliyalı ulduzun transferindən qəti şəkildə imtina etməsi Boulini məyus etdi. İşə yanaşma da mübahisə predmetinə çevrildi: Bouli Amerika futbolunda olduğu kimi məlumatların təhlili təcrübəsinə söykənirsə, Tuxel potensial yeni futbolçularla şəxsən danışmaq, onların xarakterini öyrənmək imkanını daha üstün tuturdu. İndi isə Bouli elə idman direktoru tapmaq istəyir ki, Qrehem Potterlə anlaşa bilsin. Rəhbərlik ümid edir ki, əməkdaşlıq sıx və uzunmüddətli olacaq.

Abramoviçin kadrlarının uzaqlaşdırılması davam edir
Yaxınlarda klubda 17 il çalışan əsas fizioterapevt Tyerri Loran qısa zum-zəng ilə işdən uzaqlaşdırıldı. Sentyabrda isə skaut xidmətinin rəhbəri Skott Maklahlan (klubda 11 il keçibi) və tibb direktoru Pablo Bioska (o da 10 ildən artıq çalışıb) vəzifəsini tərk etmişdi. Daha bir qovulma isə qalmaqalla müşayiət olunduğuna görə diqqəti çəkdi: “Çelsi” kommersiya direktoru Demien Uillobini yazışma zamanı başqalarını qısnama ittihamı ilə işdən azad etdi. Maraqlıdı ki, Uillobi bu vəzifəyə yalnız sentyabrın 1-də təyin olunmuşdu (London klubuna ikinci gəlişi idi, 2007-10 aralığında da “Çelsi”də çalışıb).