“Qarabağ”ı Frayburqda 100-ə yaxın azarkeş dəstəkləyəcək
Cümə axşamı, saat 23.00-da “Qarabağ” Frayburqda yerli komanda ilə Avropa Liqasının qrup mərhələsinin oyununa çıxacaq.
"Football-plus.az" xəbər verir ki, “Köhlən atlar” Almaniyada dəstəksiz qalmayacaq. Ötən sayımızda diqqətinizə çatdırmışdıq ki, Elşad Həsənov ad-soyadlı şəxs Nürnberqdən Frayburqa getmək üçün avtobus təşkil edəcək. Onunla əlaqə saxlayıb təşkilatçılığı “Qarabağ”ın edib-etmədiyini, görüşə nə qədər azərbaycanlının gələcəyini, ermənilərin təxribata əl atıb-atmayacağını soruşduq: “Sumqayıtda doğulmuşam. Hazırda Nürnberqdə yaşayıram. Almaniyaya gələndə bəxtimdən stadion evimə yaxın idi. Onsuz da futbol həvəskarıydım. Burdakı an-hava marağımı bir az da artırdı. “Nürnberq” azarkeşiyəm.
Bütün oyunları stadiondan izləyirəm. Bundan əlavə, “Türkgücü” (Münhen) klubunun “Legend” fanklubunun üzvüyəm. Təbii ki, Azərbaycan klubu Almaniyaya gəlirsə, təşkilatçılıq etmək lazımdı. Sağ olsunlar ki, Nürnberqdən Frayburqa avtobus təşkil etdilər. Sadəcə, ad açıqlamağı istəmədilər. Təşkilatçılığı “Qarabağ” etmir, dövlət qurumudu. Təxminən 100-ə yaxın azərbaycanlı oyunu stadiondan canlı izləyəcək. Çalışacağıq ki, düşmən təxribata əl atmasın. Mən Almaniyada bir çox aksiyalarda iştirak etmişəm. Özüm də mühafizəçi işləmişəm. Çalışacam ki, belə şeylər olmasın. Sağ olsunlar, “Qarabağ” rəhbərliyi ilə danışmışam. Deyiblər ki, biletin satılmasında problem olmayacaq”.
İLKİN SULTANLI
Digər xəbərlər
