Almaniyanın 3-cü bundesliqasında çıxış edən ''Türkgücü Münhen'' acı sonluqla barışmalı oldu.

Uzun müddətdi maddi problemlər yaşayan klub müflis olduğunu açıqladı və Almaniya Futbol İttifaqı (AFİ) tərəfindən turnirdən kənarlaşdırıldı. Qeyd edək ki, 1975-ci ildə yaradılan ''Türkgücü Münhen'' 2020-ci ildə 3-cü bundesliqaya yüksəlmişdi. Amma bu mövsümün əvvəlində uzun müddətdi kluba maddi dəstək verən türkiyəli iş adamı Hasan Kıvran dəstəyini çəkdikdən sonra Münhen təmsilçisinin çətin günləri başladı. ''Bild''in məlumatına görə 3-cü divizionda hər oyun bu kluba ən azı 40 min avroya başa gəlirdi. ''Türkgücü Münhen'' uzun müddət sponsor axtarışını davam etdirərək çətinliklər içində fevrala qədər dözdü.

Fevralda AFİ klubun 11 xalını sildi. Zatən sonuncu pillədə olan komandanın xilas edəcək sponsor tapılmayınca dünən ''Türkgücü Münhen'' rəsmən müflis elan olundu. Komandanın bu mövsümkü bütün nəticələri silindiyindən turnir cədvəlində bəzi dəyişikliklər baş verdi. Belə güman olunurdu ki, ''Türkgücü Münhen''i iki dəfə yenən ''Saarbrükken'' 6 xalı itməsin deyə bu kluba mövsümün sonuna qədər sponsorluq edəcək. Amma bu variant baş tutmadı.