Beş gün sonra Avropa Liqasının qrup mərhələsinin oyunları start götürəcək.

Ölkəmizi bu turnirdə “Qarabağ” təmsil edəcək. Sentyabrın 8-də “Frayburq”un qonağı olacağıq. Bundesliqa klubu qrupun favoritidi. Hazırda çempionatda 9 xalla 3-cü pillədə qərarlaşan Kristian Ştrayxın komandasında bu mövsüm baş verən dəyişiklikləri diqqətinizə çatdırmağa çalışacağıq.

11 ildi baş məşqçi olan Kristian Ştrayx
“Qarabağ”la “Frayburq”u birləşdirən bir ortaq cəhət var ki, bud a baş məşqçilərlə bağlıdı. Qurban Qurbanov 2008-ci ilin iyulundan Ağdam təmsilçisinin “sükanı arxasındadı”. Onun “köhlən atlar”la müqaviləsinin müddəti 2025-ci il iyunun 30-da başa çatacaq. Kristian Ştrayx isə 2007-dən “Frayburq”dadı. Lakin o, 2011-ə kimi köməkçi məşqçi funksiyasını yerinə yetirib. Almaniyalı mütəxəssis Markus Sorqun və Robin Datın yardımçısı olub. Ümumiyyətlə, 57 yaşlı futbol adamının məşqçilik karyerası ancaq “Frayburq”la bağlıdı. 1995-ci ildə butslarını mismardan asan sabiq yarımmüdafiəçi 1996-da əvəzedici komandada çalışmağa başlayıb. Elə həmin mövsümün sonundan 2007-yə qədər U-19-da işləyib. Almanların “Qarabağ”a qarşı üstünlüklərindən biri də məhz budu. Ştrayx “Frayburq”da hər şeyə nəzarət edir.

Əsas hədəf Çempionlar Liqasıdı
Uzun illərdi bundesliqada mübarizə aparan komandanın əsas məqsədi gənc futbolçuları yetişdirib satmaq olub. Son iki mövsümdə isə hədəflər dəyişib. Ötən il çempionatı 6-cı pillədə bitirən komanda Çempionlar Liqasına vəsiqə qazanmaq şansını son iki turda itirdi. Cari “futbol ili”ndə rəhbərlik tərəfindən Ştrayxın qarşısına bundesliqanı ilk “4-lük”də bitirmək vəzifəsi qoyulub. Alman mütəxəssis həm avrokuboklarda irəli getmək, həm də çempionatda məqsədinə çatmaq barədə düşünür. Bunun üçün “Frankurt”un (Ayntraxt) əldə etdiyi uğuru təkrarlamaq istəyir. Belə ki, “qartallar” Avropa Liqasının 2021/22 mövsümün qalibi kimi Çempionlar Liqasının qrupunda oynamaq şansı qazandı. Ştrayx bundesliqada qarşıya qoyulan hədəfə çatmağın çətin olacağını anlayır. Məhz bu səbəbdən də Avropa Liqası onun üçün çıxış yoludu. Hazırkı komanda bunu bacaracaq potensialdadı. Buna görə də “Frayburq”la oyunlar “Qarabağ” üçün çətin olacaq.

Futbolçu satışından əldə olunan qazanc
Yuxarıda qeyd etdiyimiz kimi, “Frayburq” əvvəllər futbolçu yetişdirib başqa klublara satmaqla məşğul olub. Cari “futbol ili”nin əvvəlində almanlar 6 futbolçu ilə yolları ayırıb. Qolkiper Niklas Ted, yarımmüdafiəçi Yanik Haberer və hücumçu Ermedin Dəmiroviç düşərgəni tərk edib. Forvard Nişan Burxart İsveçrə klubu “Vintertur”a 25 min avroya icarəyə verilib. Müdafiəçi Canluka İtter isə 300 min avroya “Qroyter Fürt”ə satılıb. Ən çox qazanc Niko Şlotterbekdən əldə olunub. 22 yaşlı müdafiəçini 20 milyon avroya Dortmund “Borussiya”sı alıb. Bir sözlə, bu mövsüm 3 futbolçudan ümumilikdə 20 milyon 325 min avro əldə olunub.

Təbii ki, gedənlərin əvəzinə gələnlər də var. “Frayburq-2”nin üzvü Robert Vaqnerlə rəsmi müqavilə bağlanıb. Ötən mövsüm “Nürnberq”də çıxış edən Lino Tempelman pulsuz heyətə cəlb olunub. Avstriyalı Mixael Qreqoriç “Auqsburq”dan, Mattias Ginter isə “Borussiya”dan (Münhenqladbax) ödənişiz transfer olunub. Merlin Reyl üçün “İnqolştadt”a 2,9 milyon avro ödənilib. Deniel-Kofi Kerex “Sankt Pauli”dən 4,5 milyon avroya transfer olunub. Son olaraq isə Riçu Doana görə Niderland təmsilçisi PSV-yə 8,5 milyon avro verilib. Ümumilikdə transferlərə 15,9 milyon avro xərclənilib. Beləliklə, “Frayburq” yay fasiləsini 4,43 milyon avro gəlirlə qapayıb.

Yuxarıda qeyd etdiyimiz kimi, bu komandalar bir çox cəhətdən bir-birinə oxşayır. Sadəcə, “Frayburq”un avrokuboklar təcrübəsi “Qarabağ” qədər çox deyil. Klub Almaniyanın ortabablarından olduğu üçün Avropa turnirlərinə vəsiqə qazana bilməyib. Lakin istər oyunçuların keyfiyyəti baxımından, istər marketinq, istərsə də transfer siyasətində “Frayburq” ağdamlıları üstələyir. Meydanda isə bu amillər işə yaramır. Mübarizə aparan, əzmkarlıq göstərən, təcrübəsi olan komanda qələbə qazanır.

İLKİN SULTANLI