Futbol dünyanın ən maraqlı və qəliz idman növüdü.

Burda güclü-zəif anlayışı olsa da, mahiyyət etibarı ilə o qədər də əhəmiyyət daşımır. Bəzən 90, bəzən isə 120 dəqiqə daha istəkli olan, qələbəyə inanan komanda sonda qalib gəlir. Bəzi məqamlarda isə öz tarixi irsinə hörmətlə yanaşmaq kollektivi bir addım önə çəkir.

“Neftçi” - “Rapid” görüşündən öncə avstriyalıların rahat qələbə qazanacağını düşünənlər daha çox idi. Lakin flaqmanən tərəfdarları komandaya güvənirdi. Metronun “Xalqlar dostluğu” stansiyasından “Bakcell Arena”ya doğru getdikcə əynində ağ-qara forma olan bəyləri, xanımları, uşaqları, yaşlıları görmək möhtəşəm mənzərə idi. “Forza Neftçi”, “Neftçi Mania” azarkeş qruplarının dəstə halında arenanın ətrafında yaratdığı şou, Bakının sadə vətəndaşlarını da oyuna səsləmələri komandaya olan inamdan, sevgidən xəbər verirdi.
Stadiona daxil olanda ab-hava tam fərqli həddə çatdı. Rəqibin 60-70 avstriyalı və macarlardan ibarət azarkeşləri (“Rapid”lə “Ferentsvaroş” qardaşlaşmış komandalardı) matçın daha da maraqlı olacağının xəbərçisi idi. Qonaqlar da çılğın “Neftçi” fanatlarının yaratdığı ab-havadan heyrətə gəlmişdilər. Klub rəhbərliyi də müəyyən kompozisiyalar hazırlamışdı. “Neftçi TV”nin əməkdaşı İsmayıl Abdullayevin azarkeşləri coşdurmasını, onlarla birgə klubun himnini səsləndirməsini, sadəcə, görmək lazım idi. Zaman ötdükcə həyəcan daha da artırdı. “Neftçi”nin futbolçuları son məşq üçün meydana çıxanda alqış və uğultu səsləri ətrafa yayıldı. “Rapid”in futbolçuları təxminən 7-8 dəqiqə sonra göründü. Həmin an azarkeşlər onları fitə basdı. Avstriya təmsilçisinin üzvləri, sadəcə, öz azarkeşlərini salamlamaqla kifayətləndilər. Texniki problemlər yaşansa da, “Neftçi” rəhbərliyi azarkeşlərə klub üçün yazılan rep və meyxananı təqdim etdi. Bəlkə də bu musiqilərdən biri və ya hər ikisi gələcəkdə bütün “Neftçi”sevərlərin dilinə düşəcək. Nə bilmək olar…

Oyuna ancaq jurnalistlər və azarkeşlər maraq göstərməmişdi. Dövlət və AFFA rəsmiləri də görüşü tribunadan izləyirdi. SOCAR-ın prezidenti Rövşən Nəcəf də oyuna baxmaq üçün arenaya təşrif buyurmuşdu. Futbolu sevən, ölkəmizdə keçirilən bütün idman yarışlarında iştirak edən gənclər və idman naziri Fərid Qayıbovun “Neftçi”nin formasını geyməsi də azarkeşlərin xüsusi marağına səbəb oldu. Bundan başqa, AFFA İcraiyyə Komitəsinin, demək olar ki, bütün üzvləri “Bakcell Arena”da idi. Niyə də olmasınlar?! Axı hamının keçmişində “Neftçi” səhifəsi olub.
Saat 21.00-da isveçli referi Dario Belin start fiti səslənəndə həm “Neftçi”, həm də “Rapid” azarkeşləri arenada möhtəşəm ab-hava yaratdılar. Qonaq komandanın fanatlarının hamısının əlində klub bayraqlarının olması maraqlı məqam idi. Flaqmanın üstün təsir bağışlaması yerli azarkeşləri daha da coşdururdu. Düzdü, rəqibin futbolçuları tez-tez tərəfdarların həyəcanını son həddə çatdırırdı. 42-ci dəqiqədə isə “Forza Neftçi” “Şəhidlər ölməz, vətən bölünməz” şuarını səsləndirməyə başladı. Bəlkə də onlar zamanı səhv salmışdılar. Çünki həmişə bu şuar 44-cü dəqiqədə səslənirdi. Bəlkə də bu səhv yox, Tanrının lütfü idi. Çünki 44-cü dəqiqədə Ataa Caber “Rapid”i məyus edərək azarkeşləri sevincə boğdu. Möhtəşəm anlar idi. “44”də “Neftçi” hesabı açmışdı. Bu, deyəsən, qələbəyə işarə idi.

Fasilədən sonra azarkeşlərin dəstəyi daha da artdı. Bəlkə də buna görə rəqib qapıçı nə edəcəyini bilmirdi, bəzi epizodlarda topu hara gəldi vururdu. Belə səhvlərin birində, 61-ci dəqiqədə Kenni Sayef topu ələ keçirib hesabı 2:0 etdi. Həmin an stadiondakı ab-havanı sözlə ifadə etmək asan deyil. Yaşlısından balacasına kimi hər kəs sevinirdi. Azarkeşlər komandadan 3-cü qolu tələb edirdi. Avstriya təmsilçisinə qarşı oyunda bunu bacarmaq o qədər də asan deyil. 88-ci dəqiqədə Rəhman Hacıyev fanatların bu arzusunu həyata keçirməyə yaxın olsa da, son anda Donyoya ötürmə vermək qərarına gəldi. Özü vursaydı, bəlkə də hər şey bitəcəkdi. Vyanaya döyüşməyə yox, mərhələni keçmək üçün gedəcəkdi “Neftçi”!
Azərbaycan futbolunun bir bəlası var: son dəqiqədə qapımızda qol görürük. Bu, “Neftçi”nin də başına gəldi. Və stadiona 20-30 saniyəlik səssizlik çökdü. “Forza Neftçi”nin “Neftçi” sədaları sükutu pozdu. Hakimin final fiti ilə matç başa çatdı. Avstriyalılar dəli kimi sevinirdisə, qələbə qazanan “Neftçi”nin futbolçuları üzgün idi. Bununla belə, “ağ-qaralar”ın üzvləri stadionda dövrə vurub azarkeşlərə minnətdarlığını bildirdikdən sonra meydanı tərk etdilər.

“Aris”ə Larnakada 0:2 hesablı məğlubiyyətdən sonra çoxları “Neftçi”nin mərhələ keçəcəyinə inanmırdı. Amma “ağ-qaralar” Kipr yunanlarını darmadağın etdi. İndi isə vəziyyət fərqlidi. Bakı klubu doğma meydanda “Rapid”i 2:1 hesabıyla məğlub edəndən sonra Vyanaya yollanacaq. Bu şəhəri “Avropaya açılan qapı” adlandırırlar. Möhtəşəm Osmanlı sultanı Süleyman belə buranı işğal edə bilməyib. Ümid edək ki, “Neftçi” bu şəhərdə “Rapid”i mübarizədən kənarlaşdıraraq Konfrans Liqasının pley-offuna vəsiqə qazanacaq. Bakıdakı görüşdə komanda öz əzəmətini, gücünü rəqibə göstərdi. Vyanada isə tarixinə yaraşan şəkildə mübarizə aparıb, uğurları sırasına daha birini qatmalıdı.

İLKİN SULTANLI