Çempionlar Liqasında ölkəmizi təmsil edən “Qarabağ” əvvəlki iki mərhələdə Polşa və İsveçrə təmsilçisini mübarizədən kənarlaşdırmaqla azarkeşləri o qədər ruhlandırmışdı ki, “Ferentsvaroş”la görüşə biletlər satışa çıxandan sonra cəmi iki gün ərzində, demək olar ki, tam satılmışdı.

Buna baxmayaraq, stadionun girişində əldə bilet satanlar da yetərincə idi. Oyuna maraq o qədər böyük idi ki, start fitinə 2 saat qalmasına baxmayaraq, stadionun ətrafında maşın saxlamağa yer yox idi.

İki saat əvvəl gələn azarkeş, “Qarabağ”ı yaddan çıxarmayan nazir

Oyunun startına bir saat qalıb... Tribunalar dolmaq üzrədi. Artıq azərbaycanlı azarkeşlər də başa düşüblər ki, belə qarşılaşmalarla premyer-liqa görüşləri arasında yerdən göyə qədər fərq var. Beynəlxalq matçlarda, xüsusilə də Çempionlar Liqası kimi mötəbər turnirin oyunu zamanı stadiona çətinlik çəkmədən daxil olmaq istəyirsənsə, ən azı saatyarım öncədən arenaya gəlmək lazımdı. Saatın əqrəbləri 19.19-u göstərəndə isə Sənan Şəfizadənin gur səsi “Tofiq Bəhramov”u bürüdü. Respublikanın bu gün üçün “bir nömrə” amiqosu azarkeşləri “Qarabağ” dəstək verməyə çağırdı ki, onun çağırışı qarşılıqsız qalmadı. İsinmə hərəkətləri üçün meydana çıxan “köhlən atlar”ı alqışlarla qarşılayan tərəfdarlar rəqibi görüncə, fitə basmaqla yadda qaldı. Həmin arada gənclər və idman naziri Fərid Qayıbov “Xudayar təsnifi”nin sədaları arasında “Qarabağ”ın vitse-prezidenti Fevzihan Aras və direktoru Əmrah Çəlikllə birlikdə qazonun ətrafında dövrə vururdu.

“Ataman” çox danışmadı, Baqa da “Qarabağ”a biganə qalmadı

Məsul oyundan yarım saat əvvəl MMA döyüş növündə ölkəmizi layiqincə təmsil edən Rafael Fiziyev “Qarabağ” azarkeşlərini salamladı. Şəfizadənin söz verdiyi “Ataman” ləqəbli idmançı “hər kəsə salam. Uğurlar, “Qarabağ”. Qarabağ Azərbaycandı” söyləyib, mikrofonu Sənan bəyə ötürdü. “Sumqayıt”ın baş məşqçisi Aleksey Baqa da köməkçisi ilə birgə oyunu stadiondan canlı izləyənlər arasında idi.

Fitə basılan macarlar, iki dünya çempionunun gəlişi
Hakimin start fiti ilə paralel Respublika stadionuna toplaşan 30 mindən çox azarkeş gur səslə “Qarabağ”ı irəli səsləməyə başladı ki, bu da rəqibi təzyiq altında saxlamaq demək idi. 6-cı dəqiqədə isə macar azarkeşlər onlar üçün ayrılan tribunaya gəldilər. Onların gəlişini etirazla qarşılayan yerli tərəfdarlar qonaqları fitə basdılar. Elə həmin ərəfədə Azərbaycan idmanın fəxrləri Rafael Ağayevlə Hacı Əliyev də qonaqlar üçün ayrılan sektorda yerlərini tutdular.

VAR-a görə yaşanan sükut
17-ci dəqiqədə “Ferentsvaroş” hesabı açmağa müvəffəq oldu. Ancaq vurulan qolda ofsayd şübhəsi olduğu üçün baş hakim VAR-a müraciət etməyi lazım bildi. Təxminən 40 saniyə çəkən baxış müddətində arenada ölüm sükutu hökm sürdü. Tamaşaçılar qolun oyundankənar vəziyyətdən vurulduğuna ümid edib, sanki səs salacağı təqdirdə VAR-a baxan hakimlərə mane olacaqlarını düşünüb sakit dayanmışdılar. Təəssüf ki, onların ümidi doğrulmadı və qol qeydə alındı. Buna baxmayaraq, tribunaları dolduran tərəfdarlar Qurban Qurbanovun komandasına dəstək nümayiş etdirərək, “Qarabağ” şüarı səsləndirməyə başladı. Şəfizadənin azarkeşlərə səslənməsi də öz yerində.

Tribunaları ayağa qaldıran Kvabena
Bəlkə də bu illər ərzində “Tofiq Bəhramov”da azarkeşlər qol sevincini belə çılğınlıqla qeyd etməmişdi. Ozobiçin cərimə zərbəsindən sonra qapıçıdan dönən topu tora qovuşduran Ovusu əvvəlcə azarkeşlərin qarşısına qaçıb sevincini onlarla bölüşdü. Komanda yoldaşlarının təbrikini qəbul edən forvard onlardan ayrıldıqdan sonra ehtiyat oyunçular skamyasına tərəf qaçaraq məşqçi-analitik Aydın Rüstəmovla qucaqlaşdı və ondan da alqış payını aldı.

Mükəmməl görüntü, əsəbindən dizini döyən mütəxəssis
67-ci dəqiədə azarkeşlər tribunalarda “Meksika dalğası” yaratmaqla “köhlən atlar”a əlavə güc verməyə, futbolçuları ruhlandırmağa çalışırdılar. Həmin an arenada mükəmməl görüntü izləmək mümkün idi. 70-80-ci dəqiqələr aralığında isə ağdamlıların müəyyən ərazi üstünlüyünə yiyələnməsi, ard-arda hücumlar təşkil etməsi qonaqların baş məşqçisini özündən çıxarmışdı. Stanislav Çerçesov yetirmələrinin müdafiəyə çəkilməsinə əsəbləşərək onarın irəli çıxmasını istəsə də, tapşırığı icra olunmayınca əsəbindən əllərini dizlərinə çırpmaqla yadda qaldı. Rusiyalı mütəxəssis çox istəsə də, yetirmələri Bakının bürkülü havasında hücuma çıxmağa həvəs göstərmirdi. 85-ci dəqiqədə Bəhlul Ramilin qapı önünə ötürməsinə ayaq qoya bilməyəndə isə Qurban Qurbanov başını tutmalı oldu.

RƏŞAD