“Ferentsvaroş”un “Qarabağ”a rəqib olduğu bilinən gündən Rusiya mediası – saytları, qəzetləri, portalları-mortalları, telekanalları elə canfəşanlıq edir ki, adam çaşıb qalır.

Əcəba, biz Rusiya, yoxsa Macarıstan təmsilçisinə qarşı oynayacağıq? Bir tərəfdən belə canfəşanlıq, az qala hər açıqlamada Macarıstan çempionunun Azərbaycan çempionundan üstün olduğunun vurğulanmasının səbəbi aydındı.

“Ferentsvaroş”u rus olmayan rusiyalı – osetin Salam kişinin oğlu Stanislav çalışdırır. Milli mənsubiyyətdən söz düşmüşkən, bir məqamı da xatırladım. “Neftçi”nin veteranlarından birinin mənə dediyinə görə, Bakıda “Spartak”la oyunlardan birində bizimkilər necə qəzəblənibsə, məşhur ana söyüşünü ağına-bozuna baxmadan işlədiblər. Bu isə “Spartak”ın qapıçısının xoşuna gəlməyib və elə meydanda haqq-hesab çəkmək istəyib, dolayısıyla anladıb ki, məni rusların gözünə qatmayın.

Mənə görə rusların elliklə “Ferentsvaroş”a azarkeşlik etməsinin kökündə təkcə Stas Salamoviçin bu ölkənin təmsilçisi olması dayanıb. Sadəcə, Rusiyanın klublarını və yığmalarını avrokuboklardan necə qovublarsa, qovrula-qovrula qalıblar. İnanın ki, bu adamlar, yəni ruslar indi Afrika cəngəlliklərində və ya insan ayağı dəyməyən yerlərdə komanda çalışdıran həmvətənlərinə də həvəslə azarkeşlik edirlər. Böyük və anlaşılan dərddi. Nə tökərsən aşına, o da çıxar qaşığı! Əslində FİFA və UEFA böyük turnirlərin final mərhələlərini, qitə kuboklarının finallarını sizə tapşırmaqla bu gün Ukraynada yaşanan saysız-hesabsız insan faciələrinin hansısa mənada səbəbkarıdı. Rusların qaltığına o qədər qarpız verdiz ki, dünya ağalığı iddiasına düşdülər. Stas Çerçesovun hansısa “Ferentsvaroş”un “sükanı arxasında” olmasına da indi özünütəsdiq imkanı kimi baxırlar. Baxın da, sizin Stas Salamoviçiz varsa, bizim də Qurban Qurbanovumuz var. İllər öncə sizi ad-soyadını məhz belə yazdırmağa məcbur edən adam. Daha doğrusu, adam kimi adam!

ORXAN