''Trabzonspor'' üçün Avstriya toplanışı uğursuz alındı.

"Football-plus.az" xəbər verir ki, Türkiyənin son çempionu iki İtaliya təmsilçisinə qarşı oyunda qələbə bir yana, heç qol da vura bilmədi. Bir neçə gün öncə ''Torino''dan 3 cavabsız top buraxan Abdulla Avcının komandası dünən ''Empoli'' ilə üz-üzə gəldi. Kitzbühel bölgəsindəki ''Şportştadion Lanqau''da keçirilən oyun boş tribunalar önündə baş tutdu. Bu qərar ''Trabzonspor'' fanatlarının ''Torino'' ilə matçın final fitindən sonra meydana axışması üzündən qəbul olunmuşdu. ''Empoli'' ilə oyuna gəlincə, Mattia Destronun 14-cü dəqiqədə vurduğu qol italyanlara qələbə qazandırdı. ''Trabzonspor'' bu gün vətənə qayıdaraq superkubok matçına hazırlaşmaqda davam edəcək. Qeyd edək ki, komanda superkubok uğrunda oyunda iyulun 30-da ''Atatürk Olimpiya''da ''Sivasspor''la qarşılaşacaq.

Yeri gəlmişkən, Abdulla Avcı ''Empoli'' ilə oyunun gedişində öz dilinin bəlasına düşüb. Belə ki, ''A Spor'' kanalında yayınlanan matç azarkeşsiz olduğundan Avcının Dorukhan Toközün ünvanına səsləndirdiyi tənqid ekran başındakı izləyicilər tərəfindən açıq-aydın eşidildi. Təcrübəli mütəxəssisin öz oyunçusuna ''o zonanı burax, Yusuf onsuz da içəri girir. Dəfələrlə sizə demişəm. Arxadakı ''üçlü''nü pozmayın. Önündə Yusuf var. ''Əskişhərspor''da oynamırsan ki'' sözlərini deməsi təbii ki, ''Əskişəhərspor'' camiəsi və fanatları arasında böyük narazılığa səbəb oldu. Dərhal klubun sosial şəbəkədəki rəsmi səhifəsində ''o forma müqəddəsdi, onu geymək hər kəsə nəsib olmaz'' paylaşımı edildi. Daha sonra isə klubdan da məsələ ilə bağlı rəsmi mövqe səsləndirildi: ''Anadoluda futbol inqilabını başladan klubumuzun müqəddəs formasına dil uzadan Abdulla Avcını camiəmiz və şəhərimiz adından qınayırıq''. Xatırladaq ki, son illərdə ciddi maddi böhran yaşayan və faktiki olaraq oyunlara yeniyetmələrlə çıxan ''Əskişəhərspor'' qarşıdakı mövsümü 3-cü liqada, yəni 4-cü divizionda oynayacaq.