Şahin Diniyev: "Andradenin "Qarabağ"dan ayrılmasının komandaya təsiri var, amma..." - AÇIQLAMA
"Ümumiyyətlə, avrokuboklara hazırlıq üçün həmişə vaxt azlığı olur. Ona görə də Çempionlar Liqasında ilk oyunlar gərgin keçir. Sadaladıqlarımın hər biri "Lex" - "Qarabağ" matçına da sirayət etdi. "Qarabağ"ın 0:1 uduzması faciə deyil”.
Football-plus.az xəbər verir ki, bu sözləri Şahin Diniyev deyib. Təcrübəli mütəxəssis “Qarabağ”ın Çempionlar Liqasının 1-ci təsnifat mərhələsində “Lex”ə 0:1 hesabı ilə məğlub olmasını dəyərləndirib. Ş.Diniyev cavab matçında Azərbaycan klubunun qələbə qazanacağına inandığını bildirib:
“Oyunda üstün tərəf "köhlən atlar" idi. Düzdü, matç təhlükəli vəziyyətlərlə zəngin deyildi, amma "Qarabağ" üstünlüyünü qola çevirsəydi, görüşün axarı fərqli olardı. Rəqib də Ağdam təmsilçisinin gücünü təhlil edərək kompakt müdafiə olundu. Cavab oyununda "Qarabağ"ın qələbə qazanacağına inanıram. Ona görə hamılıqla qələbəyə motivasiya olunaraq komandamızın yanında olmalıyıq... Patrik Andrade öz mövqeyində səviyyəli futbolçudi. Onun "Qarabağ"dan ayrılmasının komandaya təsiri var. Amma bunun üzərində dayanıb faciə qurmamalıyıq. Həmin məntiqlə, vaxtilə "köhlən atlar"da Ndlovu, Pedro Enrike, Reynaldo, İbrahim Şehiç, Asmir Beqoviç kimi səviyyəli futbolçular çıxış edib. Onda gərək "Qarabağ" yerində sayaydı. Halbuki komanda adı çəkilənlər olmasa belə, Konfrans Liqasının qrupundan çıxmaqla futbolumuzda yeni səhifə yazdı".
