“Jirona” La Liqanın ən xoş debütantıdı.

Kataloniya klubu elitaya dönən kimi ambisiyalı vəzifəsini açıqladı:

Azarkeşlərə oyunlara itlə gəlmək icazəsi verildi. Klub artıq ev heyvanlarının arenaya buraxılması şərtlərini aydınlaşdırır. “Jirona”nın baş direktoru Naço Mas-Baqanın fikirləri: “Stadionların heyvanlar üçün çatımlı olmasını tənzimləyən bəzi dövlət qərarları var. Arenada ayrı yer müəyyənləşdirmək imkanını araşdırırıq. Stadion ailə üçün olan yerdi. Bu üzdən ev heyvanları haqda düşünməliyik. Bu vacib siqnalı ictimaiyyətə birinci biz vermək istəyirik. Gələcəkdə heyvanların stadionda olması adiləşəcək”.

“Jirona” yaxınlarda heyvanlar üçün yeməklərin və onlara qulluq vasitələrinin istehsalı üzrə ixtisaslaşan “Gosbi” şirkəti ilə sponsorluq müqaviləsi bağlayıb. Sadəcə, Mas-Baqa iddia edir ki, bu heç də kommersiya sövdələşməsi deyil, fanatlarla daha bir əlsıxmadı.

“Jirona” farm-klub yarlığından qurtulmaq istəyir

Baş direktora inanmaq istəyirsən: həqiqətən də “Jirona” azarkeşləri ilə əla münasibətlərə malikdi. Apreldə klub sahubləri “Jirona”nın İspaniya ərazisindəki 24 fan-klubunun hər birinə anket göndərərək, gələcəyi necə görmələri ilə bağlı fikirlərini öyrənməyə çalışıb. Mas-Baqa izah edir: “Brendimizi müasirləşdirir və yeni səviyyəyə qaldırırıq. İdeya ondan ibarətdi ki, “Jirona” öz təvazökarlığından utanmasın. Klub genişlənmək xatirinə genişlənmək istəmir. “Jirona” təvazökardı və özünə xəyanət etmək fikri yoxdu. Biz kiçik komandayıq, nəyisə özümüzdən quraşdırmaqdan bezdik. Çoxları hələ də bizi qəbul etmir, biz isə unikallığımızla qürur duyuruq. “Jirona”nın zəngin tarixi var və top-komanda olmağa borclu deyil”.

Klub unikallığını çox fərqli auditoriyalar ilə fəal şəkildə bölüşür: “Jirona” Hindistana futbol oynamaq üçün yollanan ilk komanda oldu, ardından yerli Kerala ştatını subasma zamanı dəstəklədi. Ölkədə birincilər sırasında “tik-tok” hesabı açdı, hələ pandemiyaya qədər kibetidmanla məşğul oldu, 2019-cu ildə isə “Amazon”un İspaniya futbolu haqda çəkdiyi, “Six Dreams” adlanan sənədli miniserialda yer aldı.

Yeni emblemdə fanatların da qatqısı var

“Jirona” yeni mövsümə yenilənmiş emblemlə başlayır. Onu fanatlarla birlikdə yaradıblar. İlk cizgilər hələ ötən il fan-klublara göndərilmişdi. Ancaq ilk ideya azarkeşlərin xoşuna gəlmədi. Klub ciddi düzəlişlər etdi, hər addımı razılaşdırdı. Yenə də baş direktorun fikirləri: “Köhnə emblemin fanatlar üçün vacib olduğunu anlayırıq. Klub da çox rahat deyil, ancaq dəyişiklik zəruri idi. Köhnə emblemdə ad oxunmurdu ki, bu da tanınma baxımından bizə zərər vurur və düşünməyə məcbur edirdi. “Jirona” azarkeşlərin ziddinə getmək istəmir. Çalışdıq ki, tələsməyək və inkişafımızın axarını müəyyənləşdirən adamların fikirlərini öyrənək. Başqa cür mümkün deyil”.

Klub maskotu da oxşar şəkildə yaradılıb: səsvermə və azarkeşlərlə məsləhətləşmə hətta şəhərin hakimiyyət orqanlarının da bəyəndiyi rəmzi şərtləndirdi. İndi maskot hətta şəhət tədbirlərində də vacib elementdi. Bu da təəccüblü deyil, axı milçək şəhərin rəmzlərindən biridi. 4-cü əsrdə şəhərin yepiskopu olan və xristianlığa inandığına görə əzablı ölümü qəbul edən Müqəddəs Narsis (San Narkis) Jironanın səma qoruyucusu sayılır. Yepiskopun müqəddəs izləri Müqəddəs Feliks məbədində dəfn olunub. Fransa əsgərləri 13-cü əsrdə Jironanı ələ keçirəndə yepiskopun məzarını murdarlamağa çalışıblar. Ancaq sarkofaqın qapağını qaldıranda nəhəng milçək ordusu onlara hücum edərək, əsgərləri və atları zəhərlə sancıb. Klubun marketinq bölməsinin rəhbəri Eran Navarro məsələyə maraqlı yanaır: “Bəli, bu lənətə gəlmiş milçəkdi. Ancaq fanatlar milçək istəyirsə, nə edə bilərik”.