Açığı, bu yazı həmkarım Elçin Əlixanın “feysbuk” profilindəki paylaşımının məhsuludu.

Deməli, Peşəkar Futbol Liqası 26-cı turun təqvimini tərtib edərkən “Qəbələ” – “Neftçi” oyununu mayın 9-na salıb, hakim Fərid Hacıyev də start fitini 19.45-də səsləndirəcək. Bəlkə də turun proqramını hazırlayanlar heç bu məqama diqqət yetirməyiblər, yəni rəqəmlərin sirli dünyasına baş vurmayıblar, sadəcə, televiziya maraqlarını əsas götürüblər. Yəni həmin gün “Sumqayıt” – “Şamaxı” oyunu 19.20-19.25 radələrində bitəcək, ardından bir neçə dəqiqə keçməlidi ki, Qəbələdəki oyun başlasın. Öz aramızdı, 19.45-də yox, 19.50-də, lap elə 20.00-da da başlamaq olardı. İndiki həssas, rus imperializminin dünyaya meydan oxuduğu, Putin Rusiyasının suveren bir dövlətin – Ukraynanın ərazisini işğal etməyə çalışdığı məqamda oyunun başlama vaxtını 19.45-ə salmaq nə deməkdi? İkinci Dünya Müharibəsinin bitdiyi ili – 1945-i bu şəkildə rəmzləşdirməyin mənası nədi? Mənzərənin tamlığı üçün bəlkə elə hər iki komandanın futbolçuları yaxalarına Georgi lenti də taxsınlar?

Mayın 9-da Qızıl meydanda faşizm üzərində qələbənin 77-ci ildönümünü qeyd etməyə hazırlaşan Putin Rusiyası həmin qələbəni bütövlükdə öz ayağına yazır, üstəlik elə faşistlərə xas metod və vasitələr ilə bu gün dinc ukraynalılara divan tutur, insan faciələrinin sayı-hesabı yoxdu. Məhz Rusiyanın sayəsində torpaqları 30 il işğal altında qalan, aqressiv separatçılıqdan olmazın əziyyət çəkən Azərbaycanın vətəndaşları, Azərbaycanın futbol ailəsiyik. SSRİ-nin müharibədəki qələbəsinə hansısa şəkildə dəstək vermək, o olayı qeyd etmək istəyirsizsə, Bakıda nə çoxdu gözdən-könüldən uzaq restoran! Buyurun, gedin, həvəsiniz varsa… Amma ölkə çempionatında mayın 9-na oyun salmaq bir tərəfə, başlama saatını da 19.45 kimi göstərmək heç anlaşılan deyil. Sizi bilmirəm, mən bunu PFL-ə, xüsusən də Ramin Musayevə qətiyyən yaraşdırmadım!

HUŞƏNG