“Uduzan komandanın baş məşqçisinə hansı münasibəti göstərməlidilər?” - AÇIQLAMA
Növbəti mövsüm premyer-liqaya gələcək komandalardan birinin “Kəpəz” olacağı ehtimalı tez-tez səslənir.
Hələ AFFA bununla bağlı rəsmi açıqlama verməsə də, Elxan Məmmədovun Gəncəyə son səfərindən sonra ictimaiyyət arasında bu fikir daha da ciddiləşib. Gəncə şəhər stadionunda məşq üçün yardımçı meydanların salınması, arenada aparılan son təmir işləri, akademiya binasının inşası söylənilənlərin reallaşacağını göstərir.
“Sarı-göylər”in 2022/23 “futbol ili”ndə premyer-liqada, yoxsa birinci divizionda çıxış edəcəyi hələ qeyri-müəyyən olsa da, faktiki hazırda aşağı dəstədə uğursuzluq yaşamaqdadılar. Yaşar Vahabzadənin çalışdırdığı kollektiv 19-cu turda Bakıda “Neftçi-2”yə, 20-ci oyun həftəsində isə “doğma divarlar” arasında “Keşlə-2”yə yenildi. Halbuki gəncəlilər bir ara turnir cədvəlində ikinci pilləyə yüksələ bilmişdilər. Bəs nə baş verir, komanda niyə ardıcıl iki oyunda meydanı məyus tərk edir?
Bu suala cavab tapmaq üçün “Kəpəz”in baş məşqçisi ilə danışmağı lazım bildik. Yaşar bəyin reaksiyası belə oldu: “Açığı, özüm də başa düşmürəm, nə baş verir? Deyəsən, ötən mövsümdə yaşananlar bu dəfə də təkrarlanır. Xatırlayırsızsa, ötən il də qış fasiləsinə ilk “üçlük”də yollanmışdıq. Ölkə kubokunda mərhələ adlamışdıq. Fasilədən sonra hər şey 180 dərəcə dəyişdi, komanda 8-ci pilləyə yuvarlandı. Bu üzdən ssenarinin təkrarlandığını düşünürəm. Futbolçularla danışmışam, onların da fikirlərini öyrənmişəm. Hər biri problem yaşamadıqlarını, sadəcə, oyunun belə alındığını bildirir. Kimlərsə “Neftçi-2” ilə oyunda qapıçının səhvini xüsusi vurğulayıb, yenilməyimizdə bunun əsas rol oynadığını vurğulayır. Ancaq futbolda səhvsiz olmur. Tutaq ki, o səhv etdi, bəs ikinci qol, “Keşlə-2” ilə matçda qapımızda gördüyümüz qollar? Deyim ki, işimdə səhlənkarlıq edirəm, məşqləri buraxıram, belə də etmirəm. Heç Bakıya da gəlmirəm, sizinlə danışarkən də Gəncədəyəm. Ümid edirəm ki, növbəti oyunda azarkeşləri sevindirə biləcəyik”.
Azarkeşlərdən söz düşmüşkən, “Keşlə-2” ilə qarşılaşamada tribunada olan fanatların bir qismi baş məşqçinin ünvanına “istefa” şüarları səsləndirməklə yadda qaldılar. Yaşar bəyin yaşananlara münasibəti belə oldu: “Azarkeşləri başa düşürəm. Uduzan komandanın baş məşqçisinə hansı münasibəti göstərməlidilər? Amma nədənsə komanda qələbələri sıralayanda Yaşar Vahabzadə yada düşmür, iki oyun uduzan kimi günahkar mən çıxıram”.
RƏŞAD
Digər xəbərlər
