“Kəpəz”in növbəti mövsümdə premyer-liqada çıxış edəcəyi gəncəli azarkeşləri sevindirsə də, “sarı-göylər”in “transfer bazarı”nda passivliyi onları məyus edir. Gəncə klubu ilə yanaşı, elitada çıxış edəcəyi məlum olan “Turan Tovuz” artıq bəzi futbolçularla razılıq əldə edib, təlim-məşq toplanışı ilə bağlı planın cizgiləri cızılıb. Ancaq “Kəpəz”də bu yöndə durğunluqdu.

Kluba yaxın mənbələrdən əldə etdiymiz məlumata görə, yeni mövsümdə də Yaşar Vahabzadənin çalışdıracağı komanda bu günə kimi yalnız “Şamaxı”dan ayrılan Tural Axundovla ortaq məxrəcə gəlib. İki il futbolsuz qalan Elvin Yunuszadənin də adının “sarı-göylər”lə yanaşı hallanmasına baxmayaraq, onunla bağlı məşqçilər korpusu hələ qərar verməyib. Mənbəmizin sözlərinə inansaq, legioner məsələsində də məşqçilər korpusu tələsmək istəmir. Menecerlər tərəfindən bir çox əcnəbilər təklif olunsa da, baş məşqçi və klub rəhbərliyi yüz ölçüb, bir biçməyə üstünlük verir.

Heyət baxımından düşərgədə səssizlik hökm sürsə də, komandanın hansı tarixdə bir araya gələcəyi artıq məlumdu. Vahabzadə iyunun 20-də təlim-məşq toplanışının ilk mərhələsinə start verməyi düşünür. Toplanışın ilk mərhələsinin Gəncədə olacağı artıq dəqiqləşib. Başqa klublar kimi, gəncəlilər də ikinci mərhələ üçün ölkə xaricinə üz tutmağı düşünür. Sadəcə, büdcə təsdiqlənmədiyindən bunun yaxın, yoxsa uzaq xaric olacağı hələ müəyyənləşməyib.

RƏŞAD