Fernando Santuşun yığmamızın baş məşqçisi postundan uzaqlaşdırılması vətəni Portuqaliyada geniş müzakirələrə səbəb olub.

“Football-plus.az” xəbər verir ki, yerli futbolsevərlər 70 yaşlı mütəxəssisi həm uğursuz nəticələrinə, həm də AFFA-dan böyük miqdarda (müxtəlif mənbələr həmin məbləğin 2 və ya 9 milyon avro olduğunu bildirir – red.) təzminat aldığına görə qınayıb. Təbii ki, Santuşa haqq qazandıranlar da var. Sizi həmin şəxslərin Portuqaliya saytlarının rəy bölmələrində qeyd etdiyi bəzi fikirlərlə tanış edirik.

Alkino B. “Santuş doğru addım atdı. Günahkarlar onunla uzunmüddətli müqavilə imzalayanlardı. Birillik razılaşma olsun, uğurlu olduğu halda yenilənsin. Təzminatı müqavilə şərtlərinə uyğundu. Mourinyo da bu yolla varlanır”.

Renarto G. “Santuş çox böyük səhv edib. Ayıbdı! Onun nəinki özü, övladları da milyonçudu. Yenə də “sümük”dən əl çəkmir. Xəsis adam!”

Antoni F. “O, futbolu sevmir. Əslində illər əvvəl məzuniyyətə çıxmalıydı. Hədəfi təzminat qoparmaqdı və uzun müddətdi bunu bacarır”.

Samuka: “Bu adam karyerasını Ronaldoya borcludu. Ronaldo olmasa, heç kim Santuşu tanımayacaqdı. Onun sayəsində hər il klublardan milyonlar qazanır”.

Karl M. “Əvvəl Polşa, sonra “Beşiktaş”, indi də Azərbaycan... Bu adam çox ağıllıdı. Onunla müqavilə imzalayanlar CV-sinə baxmır?"

Sandro P. “O işinə davam edəcək. Daha doğrusu, klub və milli komandaları aldadıb pullarını oğurlamağa...”

KƏNAN BAHADIR