Bilindiyi kimi, yığmamızın DÇ-2026-nın seçmə mərhələsi çərçivəsində Ukraynaya qarşı keçirəcəyi matçın baş hakimi Vasilios Fotiasdı.

“Football-plus.az” sizi yunanıstanlı FİFA referisinin dosyesiylə tanış edir.

Belə ki, Fotias karyerasına ölkəsinin aşağı liqasında başlayıb. 2018-ci ildə superliqada debüt edən ədalət təmsilçisi bu çempionatda idarə etdiyi 69 matçda 345 sarı, 13 qırmızı vərəqə göstərib.

Fotiasın beynəlxalq karyerası qənaətbəxşdi. Hələ Avropa Liqasında debüt etməyən “fit sahibi” Konfrans Liqasının təsnifat və əsas, Çempionlar Liqasının təsnifat mərhələlərində forma geyib. 17, 19 və 21 yaşadək futbolçuların Avropa çempionatındakı çıxışlarında da ədaləti təmsil etdiyini bildirək.

Habelə ona beynəlxalq yoldaşlıq oyunları və Millətlər Liqasında güvənilib. Referiyə Gənclər Liqasının matçları da həvalə olunub. Referi ilk dəfə təmsilçilərimizdən birinin oyununa təyinat alıb.

Ümumiyyətlə, Fotias karyerası ərzində 153 matç idarə edib. O, bu qarşılaşmalarda 723 sarı, 29 qırmızı vərəqə göstərib.

KƏNAN BAHADIR