Məlum olduğu kimi, ilk oyunun baş hakimi Daniyar Saxi vəzifəsinin öhdəsindən layiqincə gəldi.

Qazaxıstanlı referi oyunu elə idarə etdi ki, nə şiş yandı, nə də kabab. Bəli, Albert Rieranın forma rəngiylə bağlı məlum narazılığı, üstəlik bu məqama Qazaxıstan – Azərbaycan dostluğu prizmasından yanaşması yadımızdadı. Lakin həmin məsələnin hadisələrin axarına ciddi təsir etdiyini demək çətindi. Hər halda, “qraflar”ın layiqli qələbə qazandığına, “bayquşlar” öz səhvləri üzündən məğlubiyyətlə barışmalı olduqlarına şübhə yoxdu. Elə isə növbə azı Saxi qədər dəqiq, qərəzsiz və vicdanlı idarəçiliyiylə yadda qalacağına ümid etdiyimiz Draqomir Draqanovdadı. Əvvəlcədən bildirək ki, söhbət avrokuboklarda zəngin təcrübəsi olmayan, bir qədər qəddar və azərbaycanlı futbolsevərlərə tanış ədalət təmsilçisindən gedir.

Draqomir Draqanov... 43 yaşlı bolqarıstanlı 2002-14 aralığında peşəkar futbolçu, dəqiq desək, mərkəz hücumçusu kimi fəaliyyət göstərib. Sonradan “fit sahibi” olmaq yolunda inamlı addımlar atan Draqanov indiyə qədər ölkəsində 135 yüksək, 37 aşağı liqa, 17 ölkə kuboku, 1 Bolqarıstan superkuboku matçını idarə edib. Əsas çempionat görüşlərində 604 sarı, 35 qırmızı vərəqə göstərib. Hakim karyerasının ilk qarşılaşmasını 2014-cü ildə keçirən Draqanov 2020-ci ildə FİFA referisi statusu qazanıb. O, Çempionlar və Avropa Liqasının, 19 və 21 yaşadək futbolçular arasında Avropa çempionatının seçmə mərhələsinin matçlarını, həmçinin, beynəlxalq yoldaşlıq oyunlarını idarə edib. Göründüyü kimi, Draqanov cümə axşamı Avropa Liqasında baş hakim kimi debüt matçını keçirəcək.

Bəs biz onu hardan tanıyırıq? Ədalət təmsilçisi klublarımızın avrokubok matçlarında baş hakim kimi olmasa da, VAR-da əyləşənlən sırasında görünüb. Onun Azərbaycanla ilk tanışlığı 2018-ci ilə təsadüf edir. “Fit sahibi” həmin vaxt Avropa Liqasının 1-ci təsnifat mərhələsinin “Baltsan” (Malta) – “Keşlə” (4:1) oyununda dördüncü hakim olub. Onun ölkəmizlə bağlı növbəti təyinatı isə 2023-cü ildə Avropa Liqasının pley-off mərhələsinin “Olimpiya” (Sloveniya) – “Qarabağ” (0:2) matçına təsadüf edib. Bolqar həmin görüşdə VAR hakimi olub. O, ötən ilin fevralında “Tofiq Bəhramov”da şahidlik etdiyimiz əfsanəvi “Qarabağ” – “Braqa” qarşılaşmasında da iş başında olub. Bu dəfə VAR hakiminin köməkçisi kimi. Xatırladaq ki, “köhlən atlar” həmin görüşdə 2:3 hesabıyla uduzsa da, birinci matçda 4:2 hesablı qələbə qazandığına görə tarixində ilk dəfə Avropa Liqasının 1/8 finalına adlayıb.

Ümumiyyətlə, Draqanov karyerası ərzində 232 matç idarə edib. O, bu qarşılaşmalarda 1013 sarı, 54 qırmızı vərəqə göstərib. Deməli, “Sabah”ın futbolçuları qayda pozuntusuna yol verməmiş iki dəfə düşünməli, özünü hakimin mərhəmətinə buraxmamalıdı. Məğlubiyyəti bağışlamaq olar, amma Draqanovun mərhəmət göstərməyəcəyini bilə-bilə, komandasını pis vəziyyətə qoyacaq futbolçunu hansı azarkeş əfv edəcək?

KƏNAN BAHADIR