Konfrans Liqasındakı təmsilçilərimiz bu gün meydana çıxacaq.

Belədə həmin matçları idarə edəcək hakimlər də maraq dairəmizdədi. Ən azı ona görə ki, nəinki ölkə daxilində, qitə turnirlərində də ədalət təmsilçilərinin zərərçəkənlərindən olmuşuq. Odu ki, hakimləri yaxından tanımağa dəyər.

“Sumqayıt”ın “Fehervar”la ilk oyununu Albaniyadan olan hakimlər briqadası idarə edəcək. Baş hakim Florian Lata, köməkçi hakimlər Xulio Mani və Reydi Zaimi olacaq. Dördüncü hakim funksiyasını isə Kreşnik Çyapi yerinə yetirəcək. Florian hələ gəncdi. 26 yaşlı ədalət təmsilçisi karyerasının təməllərini indi atır desək, yanılmarıq. O, Konfrans Liqasının təsnifat mərhələsində cəmi bir oyun idarə edib. 4 beynəlxalq yoldaşlıq oyununda meydana çıxan “fit sahibi” 2 dəfə 17 yaşadək futbolçular arasında Avropa çempionatının seçmə mərhələsində ədaləti qoruyub. Ölkəsində 20 oyunun həvalə edildiyi hakim burda 108 sarı, 8 qırmızı vərəqə göstərib. Karyerasına hələ ki 74 qarşılaşma sığdıran Florian həmin matçlarda 357 “sarı”, 22 “qırmızı” ilə futbolçuları üzüb.

“Sabah”ın “Makkabi” sınağını belçikalı hakimlər briqadası idarə edəcək. Baş hakim Natan Verbumenə Matias Hillart və Ruben Vins kömək edəcək. 4-cü hakim funksiyasını isə Uesli de Kremer yerinə yetirəcək. Natan Verbumen?! Bəli, bu ad sizə tanış gəlirsə, yanılmırsız. Çünki o, ötən mövsüm Misli premyer-liqasının 35-ci turunun “Sabah” – “Sumqayıt” matçında (2:0) AFFA-nın dəvəti ilə VAR-da əyləşmişdi. Həmin oyunu xatırlayanlar bilir ki, nə “bayquşlar”ın, nə də “kimyaçılar”ın hakimliklə bağlı ciddi iradı oldu. Ümid edək ki, Verbumenin “Sabah”la ikinci dəfə rastlaşması xoş təsadüf kimi yadda qalacaq. Hər halda, 2010-cu ildən peşəkar fəaliyyət göstərən 35 yaşlı ədalət təmsilçisi karyerası ərzində 266 matçda boşuna meydana çıxmayıb. Özü də siyahıya Çempionlar (1), Avropa (1), Konfrans (6) , Gənclər Liqaları (4), həmçinin beynəlxalq yoldaşlıq oyunları, 17 və 21 yaşadək futbolçuların Avropa çempionatının seçmə mərhələsindəki sınaqları ölkəsinin yüksək liqasında keçirdiyi 137 matç (578 sarı, 40 qırmızı vərəqə - red.) daxildi. Ümumiyyətlə, Verbumen karyerası ərzində 1155 sarı, 84 qırmızı vərəqə göstərib.

Nəhayət, “Zirə”nin “DAK 1904” ilə keçirəcəyi ilk oyunun hakimləri də bəllidi. Belə ki, görüşü Lüksemburqdan olan hakimlər briqadası idarə edəcək. Baş hakimi İvo Torresə Rafael Morim və Dani Dias yardım göstərəcək. 4-cü hakim funksiyasını Jasim Sabotiç yerinə yetirəcək. Torresə gəlincə, 37 yaşlı ədalət təmsilçisi ölkəsində təcrübə yığandan sonra UEFA-nın diqqətini cəlb edib. Daha doğrusu, hakim Lüksemburq çempionatında 113 matç idarə edib, 495 sarı, 22 qırmızı vərəqə göstərib. Bununla yanaşı, o, 3 beynəlxalq yoldaşlıq görüşü, 1 Gənclər Liqası, 2 Konfrans Liqası, həmçinin U-19 və U-21-lər arasında AÇ-nin seçmə mərhələ matçlarında meydana çıxıb. Göründüyü kimi, Torresin avrokubok təcrübəsi ürəkaçan səviyyədə deyil. Qeyd edək ki, ona karyerası ərzində 184 oyun tapşırılıb, bu qarşılaşmalarda 769 sarı, 31 qırmızı vərəqə göstərib.

KƏNAN BAHADIR