"Sabah" - "Partizan" qarşılaşması hakim idarəçiliyi adına asan sayılmamalıdı. Komandamız aqressiv, əzmkar, sürətli oyun tərziylə rəqibləri də açıq mübarizəyə sövq edir. Belə oyunlarda futbolçuların bir-birinə qarşı sərt müdaxilələri, ikili mübarizələr çoxluq təşkil edir. Belə görüşlər baş hakimdən xüsusi diqqət tələb edir. İlk dəqiqələrdən "Sabah" rəqib üzərinə gedərək təzyiq yaradırdı. Belqradlılar mərkəz, dayaq bölgəsində, kənarlarda "Sabah"ın hücumlarının qarşısının alınması üçün tez-tez texniki fola əl atır, oyunun tempini aşağı salmağa çalışırdı. Gürcüstanlı referi qayda pozuntularını vaxtında qeydə alsa da, əsasən oyunun əvvəlində bir-iki epizodda "Partizan" futbolçularını bağışladı, açıq göstərilə biləcək sarı vərəqələri şifahi xəbərdarlıqla əvəz etdi. Baş hakimin ilk dəqiqələrdən oyuna belə yanaşması qonaqlara əlavə şans verir, ehtiyatlı davranmaq əvəzinə ikili mübarizələrdə daha da aqressivləşirdilər. Bu amil "Sabah"ın hücumlarına, sürətin, təzyiqin daha da artmasına, qolun tez vurulmasına nisbətən mane olurdu. Baş hakim 2-ci hissədə oxşar epizodlarda ev sahibi futbolçuları bağışlamır, cəzalandırırdı. Birinci hissədə köməkçi hakim də kobud səhvlə yadda qaldı, təhlükəli hücumların birində olmayan ofsayd qərarı verildi. Qeyd olunanları çıxmaq şərti ilə, baş hakim, ümumilikdə oyunun öhdəsindən yaxşı gəlir, nəticəyə təsir edən ciddi səhvə yol vermirdi. Təcrübəli, tanınan rəqib qarşısında qətiyyətlə penaltinin göstərilməsi isə referinin hesabına yazılmalıdı. Hakimlər briqadası oyunun öhdəsindən layiqincə gələrək, sonda heç bir komandanın narazılığı ilə üzləşmədi. Bu da psixoloji çəhətdən çətin keçən qarşılaşmada obyektiv idarəçiliklə "Sabah"ın "Partizan" üzərində möhtəşəm qələbəsinin çəkisini daha da artırır".