Premyer-liqada 2025/26 mövsümünü 3-cü pillədə tamamlasa da, məlum səbəbdən Konfrans Liqasında iştirak edə bilməyən “Turan Tovuz”la bağlı ciddi narahatlıq var. Düzdü, qərb təmsilçisi iyulun 4-dən etibarən Ankaranın Qızılcahamam bölgəsində təlim-məşq toplanışına start verib. İkinci mərhələsinin Boluda keçirilməsi planlaşdırılan proses davam edir. Ancaq “bozqurd”un hələ yoxlama oyunlarında hansı rəqiblərlə qarşılaşacağı bəlli deyil. Halbuki klub hələ ötən ayın sonlarında qüvvəsini 4 yoxlama oyununda sınamağı planlaşdırdığını açıqlamışdı.

Bu məsələləri boş yerə qabartmırıq. Çünki komandanın avrokuboklardan kənarda qalmasının rəsmiləşməsindən sonra ruhdan düşməyəcəyi, növbəti “futbol ili”ndə daha yuxarı pillələr uğrunda mübarizə aparacağı, arıq 33 ilə çatacaq avrokubok həsrətinə daha güclü, inamlı formada son qoyacağı haqda xəbərlər yayıldı. Təəssüf ki, indiki durum nə tovuzluların ambisiyasına uyğundu, nə də konkret tələblərə cavab verir. Məlum olduğu kimi, elita klublarının yarışında yay “transfer pəncərəsi” iyunun 19-da açılıb. İş ondadı ki, bu çərçivədə 5 aparıcı futbolçusuyla yollarını ayıran bölgə təmsilçisi indiyə qədər cəmi iki transfer edə bilib. Bunlardan birinin qapıçı, yəni Aleksey Kenyaykin olduğunu, bir müddət əvvəl yola salınan Sergey Samokun yoxluğuna görə transfer edildiyini nəzərə alsaq, heyətin genişləndirilməsindən söhbət gedə bilməz. Biz də razıyıq ki, rəsmi açıqlama olmasa da, müəyyən oyunçularla danışıq aparıldığı dəqiqdi. Lakin proseslərin bu qədər yubanması, heyətin formalaşdırılması yönündə inamlı addımlarının atıldığının hələ isbat edilməməsi, təbii ki, tovuzlu futbolsevərləri nigaran olmağa sövq edir.

Belə mənzərə fonunda klubun yalnız infrastrukturla bağlı gördüyü işlər nəzərə çarpır. Əlbəttə, Tovuz şəhər stadionunun UEFA-nın və AFFA-nın tələblərinə uyğun hala salınması təqdirəlayiq addımdı. Azı ona görə ki, kollektiv ötən mövsümdə olduğu kimi ev oyunlarını Bakıda, ya da Sumqayıtda keçirməyə məcbur qalmayacaq, yerli azarkeşlər sevimli komandalarının matçlarını doğma şəhərdə izləyə, tribunalardan verəcəkləri dəstək sayəsində avrokuboklara yollanmaq uğrunda mübarizədə ciddi rol oynaya biləcəklər. Ancaq yenə də son sözün yaşıl meydanlarda deyiləcəyini nəzərə almalıyıq. Odu ki, “bozqurd” heyətin komplektləşməsi ilə bağlı işləri sürətləndirməli, xüsusən “Qarabağ”, “Sabah” və “Neftçi” ilə kəllə-kəlləyə gəlmək üçün güc qazanmalıdı. Çünki ötən “futbol ili”ndə də uğura çatan rəqiblər qarşıdan gələn mövsümdə daha böyük nailiyyətlərə imza ata bilmək üçün çox çalışacaqlar.

Kəsəsi, “Turan Tovuz” həm təlim-məşq toplanışında, həm də heyətlə bağlı planların həyata keçirilməsində daha fəal olmalıdı. Ən qısa müddətdə yoxlama oyunlarında qarşılaşacaqları rəqiblərin adlarına aydınlıq gəlməli, bir neçə yeni futbolçu baş məşqçi Kurban Berdıyevin sərəncamına verilməlidi. Çünki artıq “tələsən təndirə düşər” yox, “bu günün işini sabaha saxlama” deməyin vaxtı yetişib. Əsas rəqiblər komandalarını böyük ölçüdə formalaşdırıb, hətta avrokuboklardakı təmsilçilərimizdən üçü birinci təsnifat mərhələsində ilk oyunlarını keçirib. Özü də hər üçü mövsümə qələbə ilə start verib. “Bozqurd”un nəyi necə edəcəyini isə bizə zaman göstərəcək. Biz xəbərdarlıq etdik ki, dilimiz gödək olmasın...

KƏNAN BAHADIR