Söhbət yetərincə vacib, gərgin və qarşılıqlı hücumlar şəraitində keçəcəyi gözlənilən matçdan gedirsə, ədalət təmsilçisinin də roluna nəzər salmaq önəmlidi. Hər halda, indiyə qədər xeyli təmsilçimiz qərəzli qərarların, diqqətsizlikdən edilən səhvlərin və təcrübəsizliyin doğurduğu fəsadların qurbanı olub.

Bəs “Sabah” – “Selye” matçının baş hakimi Daniyar Saxidən nə gözləyə bilərik? Bu sualın dəqiq cavabı üçün qazaxıstanlı referini yaxından tanımağa çalışaq.

Daniyar Saxi... 34 yaşlı ədalət təmsilçisi karyerasının ilk rəsmi matçını 2015-ci ildə Qazaxıstanın 1-ci liqasında idarə edib. Onun sürətlə yüksələn “fit sahibləri”ndən biri olduğunu vurğulamaqda fayda var. Çünki qısa müddətdə Qazaxıstan premyer-liqasına təyinatlar almağa başlayan hakim 2017-ci ildə FİFA referisi statusuna yiyələnib. Saxi indiyə qədər Qazaxıstanda 85 premyer-liqa, 16 kubok, 2 superkubok matçını idarə edib. Elitada meydana çıxdığı görüşlərdə 290 sarı, 14 qırmızı vərəqə göstərib.

Bununla yanaşı, 17, 19, 21 yaşadək futbolçular arasında Avropa çempionatının seçmə mərhələsində, Gənclər Liqasında, Avropa Liqasının təsnifat, Konfrans Liqasının isə həm təsnifat, həm də əsas mərhələsində şans qazanıb. Referiyə Millətlər Liqasında və beynəlxalq yoldaşlıq oyunlarında da güvənilsə də, Çempionlar Liqasının təsnifat mərhələsində belə çıxış etməyib. AL-nin təsnifat mərhələsində keçirdiyi qarşılaşmaların sayı isə 3-dü. Odu ki, Saxinin avrokuboklarda zəngin təcrübəyə malik olduğunu deyə bilmərik.

Diqqəti çəkən məqamlardan biri də referinin bizə tanış sima olmasıdı. Çünki o, dəfələrlə təmsilçilərimizin matçlarına təyinat alıb.

Ümumiyyətlə, Saxinin avrokuboklarda baş hakim kimi meydana çıxdığı ilk matç Avropa Liqasının 2017/18 mövsümünün 1-ci təsnifat mərhələsinin ilk görüşləri çərçivəsində keçirilən “Zirə” – “Differdanj” (Lüksemburq) oyunu olub. “Qartallar” bu qarşılaşmada 2:0 hesablı qələbə qazanıb, hakim hər komandaya bir sarı vərəqə göstərib. Daniyarin ölkəmizlə bağlı növbəti təyinatı Gənclər Liqasının Çempionlar yolunda 2-ci mərhələnin ilk oyunları çərçivəsində keçirilən “Qəbələ” - “Herta” (Almaniya) matçıdı. Bu görüşdə “qırmızı-qaralar” 1:3 hesabıyla uduzub. Saxi bizimkilərə 1, rəqibə 2 sarı vərəqə göstərib. O, həmçinin, 21 yaşadək futbolçular arasında AÇ-2019-un seçmə mərhələsi çərçivəsində keçirilən Azərbaycan – Almaniya (0:7) oyununda iş başında olub və göründüyü kimi, bizimkilərin biabırçı məğlubiyyətinə şahidlik edib. Düzü, buna görə “fit sahibi”nə bəduğur demək insafsızlıq olar. Ona görə ki, yığma mübarizə apardığı qrupda həmin matça qədər meydana çıxdığı ilk üç oyunda da uduzduğuna görə qrup sonuncusu olmuş, Almaniyanın meydanında keçirilən ilk qarşılaşmada 1:6 hesabıyla uduzmuşdu. Saxi almanlarla matçda bizimkilərə 2, rəqibə 1 sarı vərəqə göstərib.

Maraq üçün qeyd edək ki, Daniyar Avropa Liqasının 2016/17 mövsümündə 1-ci təsnifat mərhələsinin ilk oyunlarından “Kəpəz” – “Daçiya” (Moldova) matçında dördüncü hakim olub. Oyunda hesab açılmayıb.

Ümumiyyətlə, Saxi karyerası ərzində 150 matçda ədaləti təmsil edib. O, həmin qarşılaşmalarda 457 sarı, 15 qırmızı vərəqə göstərib. Bu statistika referinin yetərincə səbrli və mərhəmətli olmasının ifadəsidi. Göründüyü kimi, “fit sahibi” hər oyunda orta hesabla cəmi 3 sarı vərəqə üçün əlini cibinə atırsa, 10 matçdan bir “qırmızı”dan istifadə edir. Hər halda, Daniyarın avrokuboklarda çıxış edən komandalarımız üçün düşərli olduğu göz önündədi.

İndi əsas məsələ ənənənin pozulmamasıdı. Yəqin ki, ədalət təmsilçisi “Zirə” ilə çıxdığı yol üçün “vəfa borcu”nu ödəyər...