Bu gün Avropa Liqasında 1-ci təsnifat mərhələsinin ilk oyunları keçiriləcək. Bu çərçivədə “Sabah” da “Selye”ni qəbul edəcək.

Masazır təmsilçisi turnirdəki debüt matçında qələbə qazanaraq bu günün tarixdə daha əlamətdar şəkildə qalmasında çalışacaq. Valdas Dambrauskasın komandasının bunu bacaracağına inanmaq olar. Hər halda, “tələbələr”in 2023-cü ilin yayında debüt etdiyi Konfrans Liqasına qələbəylə başladığını vurğulamalıyıq. Kollektiv həmin vaxt səfərdə RFS-ni (Latviya) məğlub etmişdi (2:0). Sadəcə, onda baş məşqçi hələ də rəğbətlə xatırlanan Murad Musayev idi.

Sloveniyanın iddialı təmsilçilərindən olan “Selye” ilə matç “İctimai” TV-nin efirində canlı yayınlanacaq.

Avropa Liqası, 1-ci təsnifat mərhələsi
Sabah – Selye (Sloveniya) 2:3
Pavol Şafranko, 3; 18-p. - Franko Kovaçeviç, 7; 48. Hrka, 90+3.
Hakimlər: DANİYAR SAXİ, Samat Terqeussizov, Sergey Klaçyo, Saken Baiymbet (hamısı Qazaxıstan).
VAR hakimi: Bastyen Deçepi (Fransa).
VAR hakiminin köməkçisi: Aidin Tassabayev (Qazaxıstan).
10 iyul. Bakı, “Bank Respublika Arena”. Saat 20.00.

Sizi “bayquşlar”ın bu matça hazırlıq prosesi haqda, demək olar ki, bütün detallarla tanış etmişik. Masazır təmsilçisi həm heyətini gücləndirib, həm də yoxlama matçları keçirib. Şübhə yoxdu ki, geridə qalan müddət ərzində rəqibin güclü və zəif cəhətləri haqda toplanan məlumatlar da komandaya çatdırılıb. İndi azarkeşlər önündə döyüşkən oyun göstərmək, qələbə qazanmaq arzusunu nümayiş etdirmək zamanıdı. Onsuz da “Sabah”ın futbolçularının fərdi ustalığının hansı səviyyədə olduğundan xəbərdarsız. Belədə mərhələni adlayacaq tərəfin məhz bizimkilər olacağına inanmaq sadəlövhlük sayılmaz.

“Selye”nin də UEFA-ya təqdim etdiyi iştirak ərizəsi bəllidi. “Qraflar”ın ispaniyalı çalışdırıcısı Albert Riera 28 futbolçunun xidmətindən yararlanmağı planlaşdırır. Heyətdə 3 qapıçı, 11 müdafiəçi, 6 yarımmüdafiəçi və 8 hücumçu var.

Maraqlıdı ki, klub Sloveniya mətbuatının tezliklə komandadan ayrılacağını iddia etdiyi Nikita İosifovla da ortaq məxrəcə gələ bilib – müddəti bu yay sona çatan müqavilə 2025/26 mövsümü üçün yenilənib. Bunun “Selye” üçün çox faydalı olacağını vurğulamalıyıq. Çünki 24 yaşlı hücumçu başa çatan “futbol ili”ndə meydana çıxdığı 21 matçda 4 qol, 5 məhsuldar ötürmə ilə yadda qalıb. Nikitanı özəl edən məqamlardan biri də Konfrans Liqasının 2024/25 mövsümündə aparıcı futbolçular sırasında olmasıdı. O, bu turnirdə artıq komandanı tərk edən Alyoşa Matko, Tamar Svetlin və Svit Seslarla birgə xarüqələr yaradıb. Onlar sözün əsl mənasında rəqiblərin qorxulu yuxusuna çevrilib.

Qısası, adı çəkilən futbolçuların “qraflar”la vidalaşması “Sabah” üçün böyük xoşbəxtlikdi. Hər halda, həmin futbolçular sağ cinahdan qurulan hücumlar və yerinə yetirdikləri künc zərbələri zamanı rəqibin qapısı önündə ciddi təhlükə yaradıb.
Yenə də bu sistemin onurğa sütunu sayılan oyunçulardan üçünün yoxluğu “Sabah”ı arxayınlaşdırmamalıdı. Axı “Selye”nin yeni futbolçularla gücləndiyi və hər birinin boşluqları doldurmaq üçün çox çalışacağı sirr deyil. Kollektivə uyğunlaşmaq üçün fürsət tapmasalar da...

Həqiqətən belədi. “Qraflar” mövsüm bitəndən sonra cəmi 12 gün istirahət edib və yay təlim-məşq toplanışı çərçivəsində iki yoxlama oyunu keçirib. Birinci matçı öz aralarında keçirən futbolçular ikinci görüşdə Serbiya “Çukariçki”siylə üz-üzə gəlib və uduzub – 1:2.