Konfrans Liqasının 3-cü mövsümünün qalibi “Olimpiakos” oldu.

“Football-plus.az” xəbər verir ki, indiyə qədər Yunanıstanın heç bir klubu avrokuboklarda baş mükafatı başı üzərinə qaldırmamışdı. Pirey klubunun bunu evdə - Afinada bacarması qələbənin ləzzətini ikiqat artırır. Son 22 ildə belə hadisə olmamışdı – “Feyenoord” 2001/02 mövsümündə UEFA kubokunu Rotterdamda qazanandan sonra heç bir komanda evdə qitə kuboklarından birini başı üzərinə qaldıra bilməmişdi. Halbuki 2005-ci ildə “Sportinq”in, 2012-ci ildə “Bavariya”nın belə şansı var idi. Nəhayət, 2024-də “Olimpiakos” bacardı.

Turnirin əsas qəhrəmanı finala qədər müəyyənləşmişdi. Ancaq həlledici oyunun axarı da elə alındı ki, Ayyub Əl-Kaabini diqqətdən kənarda qoymaq mümkün olmadı. Oyun çox darıxdırıcı, hətta zaman-zaman ləng alındı. Əslində finaldakı hər səhvin dəyərinin böyük olduğunu nəzərə alsaq, bu da anlaşılandı.

Penalti seriyasının artıq qaçılmaz olduğunun göründüyü anda – sona 5 dəqiqə qalmış Əl-Kaabi hamını oyatdı. O, turnirdəki 11-ci qolunu “Fiorentina”nın qapısına vurdu, halbuki “Olimpiakos” mövsümə Avropa Liqasında başlamışdı. Bir avrokubok mövsümündə pley-offda 11 qol vuran hücumçu yeni rekord müəyyənləşdirdi. Nə 2017-ci ildə Kriştiano Ronaldo, nə də 2022-ci ildə Kərim Benzema Çempionlar Liqasında bunu bacarmışdı. Falkao 12 il əvvəl Avropa Liqasında 10 qolda dayanmışdı.
30 yaşlı Əl-Kaabi az qala heçlikdən peyda olub. Ötən yay “Olimpiakos”a havayı transfer olunana qədər onun karyerasında yalnız Avropada keçirdiyi iki mövsüm var idi – Türkiyə “Hatayspor”unda oynamışdı.

Kasablankada dülgərlikdən dünya çempionatına qədər
Bu yerdə qısa arayış vermək lazım gəlir. Mərakeşli yalnız 21 yaşında peşəkar futbolçu olub, 23 yaşına qədər müdafiədə oynayıb, lap əvvəl isə vətənində dülgər işləyib. Necədi? Bəlkə də ən yaxşı ssenari kimi “Oskar” mükafatına layiq görülə bilər. Əl-Kaabi Kasablankanın sərt rayonlarından birində böyüyüb. Futbolla məşğul olmaq üçün vaxt və pul yox idi. Ailənin dolanışığına yardım etmək üçün məktəbi atmaq lazım gəldi.
Ayyub paralel şəkildə, sadəcə, “gözünün qurdunu öldürmək” üçün futbol oynayırdı. Birgə top qovduğu dostları arasında çox seçilirdi. Təbii ki, belədə başqalarının da diqqətini çəkdi: 19 yaşı olanda həvəskarlardan ibarət “Hay Hadica”ya düşdü, bir neçə ay sonra isə Mərakeş çempionatının 2-ci divizionunda mübarizə aparan “Rasinq” onu heyətinə qatdı. Hətta ölkə standartları ilə belə nəhəng klub sayılmasa da, artıq sabiq dülgərin daimi iş yeri var idi.

Hücumçu ilk peşəkar müqaviləni daha bir neçə il gözlədi. Yeri gəlmişkən, onda hələ hücumçu deyildi. “Rasinq”də onun antropometrik quruluşuna heyranlıq duyur və belə hesab edirdilər ki, müdafiənin mərkəzində oynaması yaxşıdı. Hərçənd gənc futbolçu daim irəli can atırdı. Ayyub 23 yaşı olanda mövsümöncəsi toplanışda nə qədər qol vurdusa, ondan sonra baş məşqçi ona hücumda şans verməyə başladı. Və yəqin ki, sonradan vaxtında bu addım atmadıqlarına görə özlərini söydülər: axı 33 oyunda 25 qol vuran futbolçu komandanı Mərakeşin elitasına daşıdı. Ardından yüksəliş dövrü başladı. Nisbi, lokal xarakterli, ancaq yüksəliş. 2018-ci ildə yığma ilə Rusiyada keçirilən dünya çempionatına yollanan Əl-Kaabi Portuqaliya və İran ilə oyunlarda meydana çıxdı. Çinlilərin diqqətini cəlb etdi, “Hebey” ona görə 6 milyon avro ödəməkdən çəkinmədi. Mərakeşli orda yalnız bir il davam gətirdi – uyğunlaşa bilmədiyindən vətənə, Kasablanka “Vidad”ına döndü. Sonra yuxarıda xatırlatdığımız Türkiyə və “Əl-Sədd” dönəmləri oldu, yəni adi bir futbolçu adi həyatını davam etdirdi. 2023-cü ilin fevralında “Hatayspor” çempionatdan çəkildi, onda rusiyalı insayder İvan Karpov ÇSKA-nın Əl-Kaabiyə ilə 600 min avro təklif etdiyini yazırdı, ancaq hücumçu Moskva ilə “Adana Dəmirspor” arasında uzun-uzadı seçim etdi. Nəticədə bir neçə aylığa Qətərə yollandı.
Və qəfil “Olimpiakos” variantı. 30 yaşında. Avropada xidməti olmadan. İllik bir milyon avro maaş qarşılığında. Yunanların bu gedişi açıq-aşkar özünü doğrultdu. Ayyubun yolu Karlos Bakkanı çox xatırladır. Kolumbiyalı balıqçı idi, yalnız 26 yaşında müəyyən səviyyəyə qalxdı və “Sevilya”nı Avropa Liqasında qələbələrə daşıdı. Sonradan hətta “Milan”da özünü göstərmək şansı da qazandı. Əl-Kaabini “Olimpiakos”dan daha möhtəşəm klubun istəməsi ilə bağlı əlimizdə heç bir bilgi yoxdu. Ancaq mərakeşli başa çatmaqda olan mövsümdə tarixə düşdü. Konkret Yunanıstanda onu heç vaxt unutmayacaqlar!