Mayın 31-də avrokubokların 2022/23 mövsümündə ilk turnirə yekun vuruldu. Avropa Liqasının (AL) Macarıstanın paytaxtı Budapeştdə keçirilən finalında “Roma”ya qalib gələn “Sevilya”, belə demək mümkünsə, bu turnirin imperatoru olduğunu bir daha sübut etdi!

final
Sevilya - Roma 1:1 (0:1, 1:0, 0:0), p. - 4:1
Sevilya (İspaniya): Bunu, Navas (Montyel, 94), Bade, Qudel (Markao, 120+8), Telles (Rekik, 94), Fernando (Xordan, 120+8), Rakitiç, Okampos, Torres (Suso, 46), Xil (Lamela, 46), Ən-Nəsiri.
Roma (İtaliya): Patrisio, Çelik (Zalevski, 91), Smollinq, Mançini, İbanyes, Spinatsola (Lyorente, 106), Kristante, Matiç (Bove, 120), Pelleqrini (Əl-Şaaravi, 106), Dibala (Viynaldum, 68), Abraham (Belotti, 75).
Qollar: Dibala, 35 (0:1). Mançini, 55-öz qapısına (1:1).
Penalti seriyası: Okampos – 1:0. Kristante – 1:1. Lamela – 2:1. Mançini – 2:1 (qapıçı). Rakitiç – 3:1. İbanyes – 3:1 (qapıçı). Montyel – 4:1.
Vərəqələr: Matiç, 21. Mir, 36 (meydandan kənarda). Pelleqrini, 45. Mançini, 48. Kristante, 66. Rakitiç, 66. Çelik, 74. Zalevski, 105. Lamela, 109. Xordan, 120+1 (meydandan kənarda). Montyel, 120+4. Okampos, 120+10. Karsdorp, 120+10 (meydandan kənarda) - sarı.
Hakim: Entoni Teylor (İngiltərə).
31 may. Budapeşt. 61476 tamaşaçı.

oyunun statistikası
18 (3) qapıya (“çərçivə”yə) zərbə 11 (3)
6 künc zərbəsi 4
1 ofsayd 1
21 qayda pozuntusu 19
6 (0) sarı (qırmızı) vərəqə 7 (0)
62 topa sahibolma (faizlə) 38
oyunun ən yaxşısı (UEFA-nın versiyası): Yassin Bunu (Sevilya)

“Puşkaş Arena” stadionundakı matçdan əvvəl hər kəsi ilk növbədə bu sual düşündürməliydi: “Sevilya”nın, yoxsa Joze Mourinyonun seriyası qırılacaq? Zarafat deyil, “Sevilya” son 18 ildə 7-ci dəfə AL-in (UEFA kubokunun) finalına çıxmış, bununla turnirin yeni rekordunu müəyyənləşdirmişdi. İspaniya klubunun əvvəlki bütün finalları qalib başa vurması unikal göstərici idi. Avrokuboklarda “Roma”nı ardıcıl ikinci finala çıxaran Mourinyonun komandası bir il əvvəl Konfrans Liqasının qalibi olmuşdu. Onun çalışdırdığı komandaların əsas avrokuboklarda (UEFA Superkuboku nəzərə alınmır) 6-cı dəfə finala çıxması və mayın son gününə qədərki 5 finalın hamısından qalib ayrılması da diqqəti cəlb edən fakt idi.
Budapeştdə məhz portuqaliyalı mütəxəssisinin uğurlu seriyası qırıldı.

Əvvəldən axıradək çox gərgin keçən finalın ilk hissəsində “Roma” daha yaxşı təsir bağışladı və matçda iştirakı sual altında olan Dibalanın qolu italiyalıların fasiləyə öndə yollanmasını təmin etdi. Hələ ilk hissənin sonlarından təşəbbüsü ələ alan “Sevilya”nın təzyiqi fasilədən sonra da davam etdi və Mançininin avtoqolu hesaba tarazlıq gətirdi. İkinci hissənin ortalarında müxtəlif səbəblərdən Dibala ilə Abraham kimi aparıcı hücumçuları dəyişməli olan Mourinyonun komandası əsas diqqəti müdafiəyə ayırmağa məcbur idi. Sevilyalılar əsas vaxtın sonuna qədər meydanda diqtə edən tərəf oldular. Lakin rəqibin sıx müdafiəsini yarmaq onlar üçün heç də asan deyildi.

30 dəqiqəlik əlavə vaxtda (hərçənd hakim çoxsaylı zədə və follara görə bu vaxta da kifayət qədər dəqiqə əlavə etdi) Xose Luis Mendilibarın komandası qələbə qolunu vurmaq üçün çox cəhdə əl atdı. Lakin hesab dəyişməyincə penalti seriyası qaçılmaz oldu. Bu sınaqdan qalib çıxan “Sevilya” AL-də azarkeşlərinə daha bir qələbənin sevincini yaşatdı.
Bombardirlər: Bonifas (Yunion), Reşford (Mançester Yunayted) – 6, Dibala (Roma), Ximenes (Feyenoord) - 5.
Həftənin ən yaxşı oyunçusu (UEFA-nın versiyası): Yassin Bunu (Sevilya).

Faktlar
* “Sevilya” AL-də (UEFA kubokunda) 7-ci dəfə qalib gəlməklə sahibi olduğu rekordu yenilədi. İspaniya təmsilçisi daha əvvəl 2005/06, 2006/07, 2013/14, 2014/15, 2015/16 və 2019/20 mövsümlərində turnirdə ən yüksək zirvəni fəth etmişdi.
* “Sevilya” avrokuboklarda 8-ci dəfə qalib gəldi. Komanda AL-dəki 7 qələbədən başqa 2006-cı ildə Avropa Superkubokunu da qazanıb. Maraqlıdı ki, “Sevilya” İspaniyanın daxili yarışlarında yalnız 7 dəfə qalib olub (ölkə çempionatında və superkubokunda 1, ölkə kubokunda 5 qələbə).
* “Sevilya” XXI əsrdə əsas avrokuboklarda 7-ci qələbəsini qazanmaqla yeni rekord müəyyən etdi. Komanda bu planda “Real”ı (6 titul) arxada qoydu.
* “Sevilya”nın AL-dəki (UEFA kubokundakı) növbəti uğuru İspaniya klublarının bu turnirdəki 14-cü qələbəsi oldu. La Liqa bu planda sahibi olduğu rekordu yenilədi. “Atletiko” indiyədək bu yarışda 3, “Real” 2, “Valensiya” və “Vilyarreal” isə 1 dəfə çempion olub. İtaliya və İngiltərə klubları 9, Almaniya təmsilçiləri 7 dəfə AL-in qalibi olublar.
* İspaniya klubları avrokubokların finallarında 2001-ci ildən sonra başqa ölkələrin təmsilçilərinə uduzmurlar. Sonuncu dəfə belə hala 22 il əvvəl təsadüf edilib. Onda “Bavariya” ÇL-in finalında “Valensiya”ya, “Liverpul” isə UEFA kubokunun finalında “Alaves”ə qalib gəlib. İspaniya klubları ÇL-in 2001/02 mövsümünün finalında “Real”ın “Bayer-04” üzərindəki qələbəsindən başlayaraq qitə kuboklarının 18 həlledici oyununda digər ölkələrin təmsilçilərinə məğlub olmayıblar.
* Mendilibar məşqçi karyerasında ilk titulunu qazandı.
* Mendilibar AL-in tarixinə ən yaşlı qalib məşqçi kimi düşdü. Mayın 31-də 62 yaş 78 günlüyündə olan ispaniyalı mütəxəssis bu planda Mauritsio Sarrinin rekordunu yenilədi. Hazırda “Latsio”nu çalışdıran italiyalı 2019-cu ildə 60 yaş 139 günlüyündə olarkən “Çelsi”ni bu turnirdə çempionluğa daşıyıb.
* Mourinyo məşqçi karyerasında ilk dəfə əsas avrokubokların finalında məğlub oldu. O, daha əvvəl “Portu”nu UEFA kubokunda (2003) və ÇL-də (2004), “İnter”i ÇL-də (2010), “Mançester Yunayted”i AL-də (2017), “Roma”nı isə KL-də (2022) qələbəyə daşımışdı.
* Budapeştdəki finalda ümumilikdə 13 futbolçu sarı vərəqə aldı. Bu, turnirin həlledici oyunlarında qeydə alınan ən yüksək göstəricidi. 7 oyunçusuna xəbərdarlıq edilən “Roma” AL-in finalının bir komanda üçün antirekordunu müəyyənləşdirdi.