Bu gün avrokubokların 2023/24 mövsümündə ikinci turnirə yekun vurulacaq: Yunanıstanın paytaxtı Afina şəhərində Konfrans Liqasının (KL) finalı keçiriləcək. Həlledici matçda “Olimpiakos” və “Fiorentina” qarşılaşacaq.

Konfrans Liqası, final
Olimpiakos (Yunanıstan) – Fiorentina (İtaliya) 1:0
Əyub ƏlKaabi, 116
Hakim və köməkçiləri: Artur Diaş, Paulu Soareş, Pedro Ribeyro (hamısı Portuqaliya), Qlenn Nüberq (İsveç).
VAR hakimləri: Tyaqo Martinş (Portuqaliya), Kristian Dinqert, Marko Frits (hər ikisi Almaniya).
Cəzalı: yoxdu.
Avrokuboklarda qarşılaşmayıblar.
29 may. Afina (Yunanıstan), “Ayya Sofiya” stadionu.

Bəri başdan bu komandaların “3-cü dərəcəli” qitə kubokunda çempion olan uyğun olaraq ilk Yunanıstan və ya ikinci İtaliya (“Roma” 2021/22 mövsümündə qalib gəlib) təmsilçisi kimi tarixə düşə biləcəyini qeyd edək.

“Olimpiakos” tarixində ilk dəfə qitə kuboklarının finalına çıxıb. Komandanın əvvəlki ən yaxşı göstəriciləri Çempionlar Liqasının 1998/99 və Kuboklar Kubokunun (KK) 1992/93 mövsümünün 1/4 finalında oynaması ilə bağlı olub. Onu da xatırladaq ki, avrokuboklarda indiyədək finalda oynayan yeganə Yunanıstan komandası Çempionlar Kubokunun 1970/71 mövsümünün son oyununda “Ayaks”a uduzan (0:2) “Panatinaikos” olub. “Olimpiakos” cari mövsümdə qitə arenasında ikinci kuboku qazanmaq şansına malikdi. Pirey klubunun gənclərdən ibarət komandası artıq UEFA Gənclər Liqasının qalibi olub.

Xose Luis Mendilibarın çalışdırdığı komanda KL-də mübarizəyə Avropa Liqasının (AL) qrupunda 3-cü yeri tutmaqla qoşulub. Pireylilər finala doğru yolda “Ferentsvaroş” (Macarıstan), Təl-Əviv “Makkabi”si (İsrail), “Fənərbaxça” (Türkiyə) və “Aston Villa”nı (İngiltərə) mübarizədən kənarlaşdırıblar. Bir il əvvəl “Sevilya”nı AL-də qələbəyə daşıyan Mendilibar ardıcıl ikinci dəfə avrokubokda qalib gəlmək şansına malikdi. Xatırladaq ki, 63 yaşlı ispaniyalı mütəxəssis “Olimpiakos”un baş məşqçi vəzifəsinə cari mövsümün gedişində - fevralda təyinat alıb. Digər maraqlı faktlar isə komandanın əsas qol silahı sayılan Ayub Əl-Kaabi ilə bağlıdı. Yarımfinalda “Aston Villa”nın qapısına iki oyunda 5 dəfə yol tapan hücumçu “Olimpiakos”un tarixinə bir avrokubok mövsümündə 12 qol vuran ilk futbolçu kimi düşüb. 30 yaşlı mərakeşli KL-in cari mövsümünün əsas mərhələsində 10 qolla bombardirlərin yarışına başçılıq edir.
Turnirin ötən mövsümünün finalçısı olan “Fiorentina” ardıcıl ikinci dəfə həlledici oyunda iştirak edəcək. Xatırladaq ki, Vinçentso İtalyanonun komandası bir il əvvəl Çexiyanın Praqa şəhərində baş tutan finalda “Vest Hem”ə 1:2 hesabı ilə məğlub olmuşdu. Florensiya klubu indiyədək avrokuboklarda bir dəfə qalib gəlib: KK-nın 1960/61 mövsümünün ən yaxşı komandası olub. “Fio”nun müxtəlif qitə kuboklarının finalında daha 4 dəfə uduzduğunu da xatırladaq.
İtalyanonun komandası bu mövsüm Avropa arenasında məğlub olmayıb. “Fiorentina” mübarizəyə KL-də başlayıb. Qrupu lider kimi başa vurduqdan sonra pley-off mərhələsində Hayfa “Makkabi”si (İsrail), Plzen “Viktoriya”sı (Çexiya) və “Brügge”ni (Belçika) mübarizədən kənarlaşdırıb. “Bənövşəyilər”in bu turnirdəki ən yaxşı bombardiri 4 qolla Lukas Beltrandı.

Final “Ayya Sofiya”da keçiriləcək. Yunanıstanın paytaxtı Afinada yerləşən stadion AEK-in rəqiblərini qəbul etdiyi idman qurğusudu. Əvvəlki “Nikos Qumas”ın yerində inşa edilən arena 32500 yerlikdi. Burda ilk rəsmi matç 2022-ci ilin sentyabrında keçirilib. Stadion 2023-cü ildən Yunanıstan yığmasının oyunlarını da qəbul edir.

“Olimpiakos” – “Fiorentina” matçını Artur Diaş idarə edəcək. Portuqaliyalı beynəlxalq səviyyədə 2010-cu ildən fəaliyyət göstərir. O, avrokubokun finalına ilk dəfə təyinat alıb.